Në Ditën Ndërkombëtare të së Drejtës për Informim, “Faktoje” numëron dhjetëra pyetje të mbetura pa përgjigje nga ministritë. Ministria e Shëndetësisë është institucioni së cilit gjatë pandemisë i jemi drejtuar vazhdimisht për informacion mbi situatën nga Covid-19, por detyrimit ligjor, institucioni i është përgjigjur me refuzim. Aktualisht nuk dihet sa tamponë kryhen në laboratorët publikë dhe sa në privat, cilat janë protokollet e mjekimit për personat e prekur nga koronavirusi dhe a kryen Ministria e Shëndetësisë analiza post-mortum, a ka ajo në plan të ndërmarrë nisma për testime serologjike siç ka premtuar.
Ministria e Shëndetësisë vijon të mbetet ndër institucionet më jotransparente edhe gjatë periudhës së pandemisë. Raportimi i rregullt përmes konferencave për shtyp apo aktivitetet e titullarëve të ministrië që shpërndahen me video, nuk u japin dot përgjigje shumë pikëpyetjeve mbi situatën e krijuar nga pandemia.
“Faktoje”, në mënyrë të herëpasëhershme ka dërguar kërkesa për informacion tek Ministria e Shëndetësisë, me qëllim marrjen e informacioneve të cilat konsiderohen publike, por është përballur me refuzim nga ky institucion.
Më 5 shtator, “Faktoje” pyeti në Ministrinë e Shëndetësisë lidhur me testet molekulare, serologjike si dhe përllogaritjen e mortaliteteve.
Megjithëse një detyrim ligjor, Ministria e Shëndetësisë, përtej afateve, nuk vë në dispozion asnjë përgjigje. “Faktoje” e ankimoi moskthimin e përgjigjes te Komisioneri për të Drejtën e Informimt më 21 shtator.
Edhe pas ankimit te Komisioneri, ende nuk kemi marrë një përgjigje.
Aktualisht nuk dihet se sa testime dhe në sa laboratorë publikë kryhen ato. Ministrja e Shëndetësisë, Ogerta Manastirliu deklaroi se me mbërritjen e vjeshtës do dyfishoheshin testimet për persona të dyshuar me Covid-19, por megjithatë kjo nuk ndodhi.
Nga ana tjetër, ekspertët rekomandojnë kryerjen e së paku 2,500 testimeve në ditë, me qëllim pasjen e një pasqyre të saktë të pandemisë Covid-19.
Po ashtu, ministrja Manastirliu deklaroi se do kryeheshin testime serologjike në një kampion popullsie me qëllim pasjen e një panorama lidhur me krijimin e antirupave, por deri më tani edhe ky premtim nuk është mbajtur.
Të paqarta mbeten përllogaritjet për vdekshmërinë nga Covid-19 dhe protokollet e mjekimit të personave të hospitalizuar, por i gjithë ky informacion që kërkohen në mënyrë të vazhdueshme nga Faktoje, vazhdon të refuzohet nga ministria e Shëndetësisë.
- Lexo dhe: Ministria e Shëndetësisë “hermetike” në dhënien e informacionit
- Lexo dhe: Pandemia ‘vështirëson’ komunikimin me Ministrinë e Shëndetësisë
- Lexo dhe: 11 kërkesa, asnjë përgjigje nga Ministria e Shëndetësisë qëkur nisi pandemia e Covid-19!
*Foto kryesore është marë nga rrjeti social “Facebook” i ministres së Shëndetësisë, Ogerta Manastirliu.
