BallinaPertejVerifikimi i lajmeve në FacebookKQZ nuk vendos të njohë ligjërisht Bashën si kryetar të Partisë Demokratike

KQZ nuk vendos të njohë ligjërisht Bashën si kryetar të Partisë Demokratike

Lajmi mbi përcaktimin që Komisioni Qendror i Zgjedhjeve ka bërë lidhur me propozimim e vëzhguesve për zgjedhjet e 14 majit 2023 është keqinterpretuar nga portalet si “njohje ligjore të Lulzim Bashës si kryetar i PD-së nga KQZ-ja”. Përtej keqinformimit mbi vendimin procedurial të KQZ, rikujtojme se pas dorëheqjes së Lulzim Bashës nga kryesimi i partisë në Mars 2022, “vulën” e partisë e ka nënkryetari i partisë Enkelejd Alibeaj.

Jona Plumbi

Përcaktimi nga KQZ i partive që do të kenë anëtarë në Komisionet e Zonave të Administrimit Zgjedhor në zgjedhjet e ardhshme vendore, është nxjerrë jashtë konteksti nga portali zgjohushqiptar.info. Kjo procedurë mëse burokratike e KQZ ka shërbyer për të njoftuar nga portal si certifikim nga KQZ i Lulzim Bashës në krye të Partisë Demokratike dhe mbetjen pa vëzhgues të kryetarit de facto të partisë, Sali Berisha.

E FUNDIT/ KQZ njeh ligjërisht Lulzim Bashën si kryetar të PD, Berisha mbetet pa përfaqësues në KZAZ”, shkruan titulli i artikullit të publikuar nga portal në 9 janar. Duke verifikuar më tej përmbajtjen e artikullit mund të zbulohet se titulli është një keqinterpretim i procedurës së Kodit Zgjedhor, i cili ngarkon KQZ me detyrën për të caktuar anëtarët e komisioneve zonale që organizojnë procesin e votimit bazuar në rezultatet e zgjedhjeve të fundit dhe mandateve të fituara nga partitë garuese. Sipas nenin 29 të Kodit Zgjedhor, KZAZ përbëhen nga 7 anëtarë dhe sekretari, nga të cilët “dy anëtarë propozohen nga partia kryesore e shumicës parlamentare, dy anëtarë propozohen nga partia kryesore e opozitës parlamentare, një anëtar propozohet nga partia e dytë e shumicës parlamentare dhe një anëtar propozohet nga partia e dytë e opozitës parlamentare”.

Gjithashtu, duhet të kujtojmë se Lulzim Basha dha dorëheqjen si kryetar i partisë pas zgjedhjeve të pjesshme lokale të Marsit 2022 dhe se mbledhja proceduriale e Komisionit Qendror të Zgjedhjeve gjatë të cilit  “komisioneri përcaktoi partitë poltike që do të propozojnë anëtarët dhe sekretarët e KZAZ-ve, për zgjedhjet për organet e qeverisjes vendore” nuk ka të bëjë aspak me certifikimin e njërit apo tjetrit në krye të partisë.

Kontekst

“Çarja e madhe” në Partinë Demokratike ndodhi pas zgjedhjeve parlamentare të 25 Prillit 2021, për të kulmuar në Janar të vitit 2022, kur selia e PD u kthye në arenën e përplasjes mes dy grupimeve. Në një anë, mbështetësit e Lulzim Bashës dhe vendimin e tij për të përjashtuar Sali Berishën nga grupi parlamentar demokrat pas shpalljes non grata nga SHBA-ja. Në anën tjetër mbështetësit e Sali Berishës të cilët akuzojnë Lulzim Bashën se “e shiti” liderin historik të partisë dhe të cilët nuk e pranojnë largimin e Berishës nga grupi parlamentar i PD-së.

Sali Berisha vendosi të rimarrë kontrollin e partisë përmes thirrjes së mbledhjes së organit më të lartë vendimmarrës të Partisë Demokratike, Kuvendit Kombëtar, në datën 11 Dhjetor 2021. Një nga vendimet e kësaj mbledhjeje ishte edhe shkarkimi i Lulzim Bashës. Një javë më vonë, Lulzim Basha organizoi një tjetër mbledhje të Kuvendit Kombëtar të Partisë Demokratike. Nga ky moment, nisi beteja ligjore për vulën dhe logon e PD-së.

Dy janë çështet në gjykatë lidhur me drejtimin e Partisë Demokratike.

E para, është çështja gjyqësore që ndodhet në gjykatën e Apelit të Tiranës, pas vendimit të gjykatës së shkallës së parë, që njohu Kuvendin kombëtar të 11 Dhjetorit, thirrur nga Sali Berisha ku u votua edhe shkarkimi i Lulzim Bashës. Ky vendim u apelua nga Enkelejd Alibeaj dhe pret ende gjykim.

*faksimile e vendimit të Gjykatës së Tiranës mbi Kuvendin e datës 11 Dhjetor
*faksimile e vendimit të Gjykatës së Tiranës mbi Kuvendin e datës 11 Dhjetor

E dyta, është çështja gjyqësore përmes së cilës Enkelejd Alibeaj kërkon regjistrimin e vendimeve të Kuvendit të 18 dhjetorit. Edhe ky një proces që pret të gjykohet.

Dorëheqja e Lulzim Bashës

Deri në Mars të 2022-shit, në zgjedhjet e pjesshme lokale, Lulzim Basha ishte ende kryetar i Partisë Demokratike, ashtu si figuron edhe në regjistrimin e subjekteve për zgjedhjet në KQZ. Por pas zgjedhjeve, në 21 mars 2022, Basha njoftoi dorëheqjen e tij si kryetar i PD-së.

Sipas statutit të Partisë Demokratike, kryesimi  partisë  kalon njërit nga nënkryetarëve të partisë.

Nënkryetarë të Partisë Demokratike janë Jorida Tabaku dhe Enkelejd Alibeaj, por përmes një njoftimi për media, Sekretari i Përgjithshëm Gazment Bardhi komunikoi se Jorida Tabaku u tërhoq nga “e drejta statutore për t’u propozuar në Këshillin Kombëtar për drejtimin e Partisë” duke komanduar Enkelejd Alibeajn në krye të Partisë.

Përfundimi

Pavarësisht mënyrës si shkojnë çështjet ligjore që Partia Demokratike ka në Gjykatë, një gjë është e sigurtë, Lulzim Basha nuk është më kryetari i saj dhe kjo falë dorëheqjes së tij. Ndaj nuk ka asnjë mënyrë se si KQZ-ja të njohë ligjërisht Bashën si kryetar.

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin

Të fundit

Më të lexuarat

spot_img