Ndërtimi i qendrave shëndetësore në të gjithë fshatrat ku ato mungojnë, ishte ndër premtimet e kryetarit të Bashkisë Belsh, Arif Tafani gjatë fushatës elektorale të vitit 2015. Nga verifkimi që Faktoje bëri në terren rezulton se ky premtim nuk është përmbushur, pasi ka ende fshatra pa qendra shëndetësore.
Gjatë fushatës elektorale për zgjedhjet vendore të 21 qershorit 2015, në një intervistë për “Birn”, kryetari i Bashkisë Belsh, Arif Tafani premtoi ndërtimin e qendrave shëndetësore në të gjithë fshatrat ku ato mungonin.
I pyetur se cilat ndërhyrje planifikonte të ndërmerrte brenda vitit të pare të mandatit për përmirësimin e infrastrukturës rrugore, godina arsimore apo shëndetësore në bashkinë e Belshit, Tafani u përgjigj: “Ndërtimi i qendrave shëndetësore në të gjithë fshatrat ku ato mungojnë.”
“Faktoje”, më 24 tetor pyeti në Bashkinë Belsh lidhur me investimet e kryera për ndërtimin e qendrave shëndetësore.
Nga Bashkia Belsh na u komunikua se në harkun kohor të 5 viteve janë ndërtuar 3 qendra shëndetësore, ndërsa 5 fshatra vijojnë të mos e kenë një të tillë.
“Faktoje”, ishte në fshatin Seferan të Bashkisë Belsh për të verifikuar në terren nëse ofrohej shërbimi në qendrën shëndetësore, por e gjeti atë të mbyllur.
“Qendra shëndetësore është e re, nuk ka shumë që u ndërtua. Nuk e ka bërë bashkia, por Estref Gjoshi. Problemi është se këtu është përcaktuar vetëm një infermier i cili vjen me ditë e thuajse nuk e gjen ndonjëherë aty” – i tha “Faktojes”, Vullnet Gjoshi, banor i fshatit Seferan.
Në lagjen Hysë të Belshit, rreth 500 banorë ishin endenë pritje të ndërtimit të qendrës shëndetësore.
“Qendra shëndetësore e vjetër ishte tejet e degraduar ndaj dhe u shemb. Kanë hapur vendin për ndërtimin e qendrës së re, por deri tani nuk kanë nisur nga puna për ndërtimin e saj” – i tha “Faktojes”, Majlinda Plaka, banore e lagjes Hysë në Belsh.
Referuar të dhënave nga relacioni i buxhetit afatmesëm 2019-2021 të Bashkisë Belsh rezulton të jenë parashikuar investime, kryesisht në bujqësi apo turizëm, por nuk ka të dhëna mbi investime për ndërtimin e qendrave shëndetësore.
Nga informacioni që siguruam dhe verifikimi në terren vendosëm që, premtimin e kryetarit të Bashkisë Belsh, Arif Tafani se deri në vitin 2019 do ishin ndërtuar qendrat shëndetësore në gjitha fshtrat ku ato mungonin, ta kategorizojmë si premtim të pambajtur.
“Faktoje”, e mbështetur nga National Endowment Democracy (NED) po monitoron 10 bashki në vend, dhe po verifikon nëse janë mbajtur ose jo premtimet e dhëna nga kryebashkiakët.
