Një figurë që i përngjason një helikopteri e gjetur në një pllakë hieroglifesh egjiptiane përdoret nga konspiracionistët si dëshmi se teknologjia moderne ka qenë përdorur nga njerëzit e lashtë. Verifikimi i “Faktoje” shpjegon se figura në fjalë është formuar në mënyrë rastësore nga mbivendosja e disa hieroglifeve mbi njëra tjetrën.
—————————————–
Publicisti Alfred Cako shpërndau në faqen e tij në Facebook foto të një hieroglifi egjiptian të famshëm mes konspiracionistëve që i përngjason një helikopteri. “Ne nuk kemi as 10% te diturise qe kishin Antiket e lashte,” shkruan Cako në 13 prill. Postimet e Cakos kanë një ndjekje të konsiderueshme dhe ngjallin interes dhe komente në rrjetet sociale. Për këtë arsye Faktoje vendosi të verifikojë më tej këtë pretendim.
I ashtuquajturi “hieroglifi helikopter” ndodhet në Tempullin e Seti I në Abydos, një nga qytetet më të vjetra të Egjiptit të lashtë. Ai është bërë i famshëm në disa rrethe konspiracioniste ku përdoret si ‘provë’ se qenie inteligjente jashtëtokësore kanë patur kontakt me njerëzit e antikitetit, një teori pseudoshkencore e njohur si “astronautët e lashtë”. Disa syresh shikojnë në këtë mbishkrim të lashtë edhe formën e një nëndetëseje dhe një anijeje jashtëtokësorësh.
Sipas arkeologëve dhe egjiptologëve, interpretimi i këtij hieroglifi si një ‘helikopter i lashtë’ shpërfill krejtësisht kontekstin e tij historik.
Një praktikë e zakonshme në Egjiptin e lashtë ishte rigdhendja e hieroglifeve të reja mbi ato ekzistuese. Ajo që duket si figura e një helikopteri është në të vërtetë pasojë e një palimpsesti, mbishkrimi i një teksti mbi një tekst ekzistues.
Tempulli ku këto hieroglife gjenden u ndërtua fillimisht gjatë mbretërimit të Seti I, dhe u përdor më pas edhe gjatë mbretërimit të pasardhësit të tij, Ramesses II.
Figura e ‘helikopterit’ është formuar si pasojë e mbishkrimit të hieroglifeve të emrit të Ramesses II mbi ato të emrit të Seti I, siç tregohet në figurën e mëposhtme, dhe erozionit që ka pësuar për mijëra vite sipërfaqja ku ato janë gdhendur.
Arkeologu Matt Peeples shpjegon se gdhendjet e mësipërme përkthehen në “ai që prapëson armiqtë e të nëntëve [Egjipti]”, titulli i Seti I, dhe “ai që mbron Egjiptin dhe përmbys vendet e huaja”, titulli i Ramesses II.
“Faktoje” ka përgënjeshtruar dhe më parë teoritë konspirative të shpërndara nga Cako.
