Në Shqipëri po injektohen disa lloje vaksinash anticovid. Përveç vaksinave të Kompanive Pfizer dhe AstraZeneca të miratuara nga dy institucionet ndërkombëtare EMA dhe FDA, po injektohen edhe të ashtuquajturat vaksina ruse Sputnik V dhe kineze Sinovac. Këto të fundit, që po vijnë në sasi të mëdha nuk prodhohen më në Kinë, por në Turqi. Ky fakt nuk është bërë transparent për publikun,por Faktoje verifikoi se injektimi i vaksinës ‘kineze’ e paketuar në Turqi dhe e autorizuar nga agjencia turke, është ligjëruar nga qeveria shqiptare duke e ndryshuar për herë të tretë brenda një muaji aktin normativ.
Pandemia Covid 19, bëri që e gjithe bota të vihet në kërkim të një vaksine anticovid. Si pasojë e kësaj emergjence, në Shqipëri, sot po injektohen disa lloje vaksinash. Vaksinat e prodhuara nga Pfizer dhe Astra Zenica janë autorizuar nga EMA dhe FDA. Por për të përballuar këtë emergjencë shëndetësore në vendin tonë ka nisur vaksinimi me vaksinën ruse Sputnik V dhe atë kineze Vero Cell Coronavac, të krijuar nga Sinovac Life Science Co, Ltd.
Në 25 mars të këtij viti, kryeministri Rama njoftoi se kishte siguruar 1 milionë vaksina kineze, një pjesë e të cilave mbërrinte po atë ditë përmes Turqisë, në aeroportin e Rinasit.
“Kemi siguruar 1 milionë vaksina të tjera.Kontraktuam për momentin gjysmë milionë doza brenda 60 ditësh. Sjellim sot në Tiranë 192 mijë.Për më shumë pas pak orësh në Rinas dhe kur ju them do t’ia dalim, mos e dyshoni kurrë që do t’ia dalim”.-tha kryeministri në aeroportin e Rinasit.”-tha kryeministri në aeroportin e Rinasit.
Duke qenë se vaksina e prodhuar në Kinë nuk kishte autorizimin për përdorim as nga FDA e as nga EMA, Neni 2 në aktin normativ nr.1, date 10.1.2021, të Këshillit të Ministrave, u ndryshua nga:
” Vaksinat anticovid-19 aprovohen për përdorim në popullatë bazuar në aprovimet e Food and Drugs Administration të Shteteve të Bashkuara të Amerikës (FDA) dhe/ose European Medicine Agency (EMA) të Bashkimit Europian.”
Screenshot neni 2, i Aktit Normativ për marrëveshjen për përdorimin e vaksinës, datë 10 janar të vitit 2021
Në:
Neni 2 – Vaksinat anticovid-19 aprovohen për përdorim në popullatë bazuar në aprovimet e Food and Drugs Administration të Shteteve të Bashkuara të Amerikës (FDA) ose European Medicine Agency (EMA) të Bashkimit Europian ose të trupave të tjera certifikuese të vendeve që prodhojnë vaksina anticovid-19.
Screenshot neni 2, i Aktit Normativ për marrëveshjen për përdorimin e vaksinës, datë 12 mars të vitit 2021.
Me aktin normativ nr. 9, datë 24.03.2021, u miratua teksti i marrëveshjes, ndërmjet Ministrisë së Shëndetësisë dhe Mbrojtjes Sociale, ministrit të Shtetit për Rindërtimin, Institutit të Shëndetit Publik dhe distributorit të autorizuar “Keymen Ila9 Sanayi ve ticaret”, A.S, për furnizimin e Republikës së Shqipërisë me vaksinën kundër Covid-19 (Vero Cell) Coronavac, të krijuar nga Sinovac Life Science Co, Ltd. dhe të prodhuar në Republikën Popullore të Kinës, sipas tekstit që i bashkëlidhet këtij akti normativ.
Screenshot neni 1 i Aktit Normativ për marrëveshjen për përdorimin e vaksinës, 22 mars 2021
Ndryshe nga vaksinat Pfizer dhe AstraZeneca, të miratuara për përdorim në popullatë nga EMA dhe/ose FDA, vaksina Kineze ishte aprovuar për përdorim emergjent në Kinë nga Autoriteti Rregullator i këij vendi (Administrimi i produkteve mjekësore kombëtare). Sipas relacionit shoqërues të aktit normativ në Kuvendin e Shqipërisë, sipas informacionit të përcjellë nga Ministria e Shëndetësisë në Turqi, kjo vaksinë që po përdorej në popullatë kishte marrë një autorizim përdorimi emergjent (EUA emergency use authorization – autorizimi i perdorimit emergjent) nga Agjencia Turke e Barnave dhe Pajisjeve Mjekesore.
Ky lloj autorizimi jepet nga Agjencia për vaksinat që përdoren për raste të jashtëzakonshme kur kërcënohet rëndë shëndeti publik dhe kur bëhet fjalë për sëmundje infektive sipas Organizatës Boterore të Shendetesise (OBSH) ose Ministria e Shëndetësisë e shtetit përkatës.
Vetëm 16 ditë nga miratimi i teksit të marrëveshjes me distributorin turk për vaksinën e prodhuar në Kinë, Qeveria Shqiptare me aktin normativ nr. 14, datë 7.4.2021 ndyshoi sërish teksin e kësaj marrëveshjeje. Sipas relacionit shoqërues arsyeja e këtij ndryshimi është se Kina ka njoftuar që Sinovak Life Science CO Ltd ka ndërprerë furnizimin e kompanisë turke me vaksinën CoronaVac Covid-19 (Vero Cell) si një produkt i përfunduar në Kinë.
Në këto kushte kompania turke propozoi të sjellë në Shqipëri vaksinën që përdoret në Turqi, CoronaVac 600SU/IM – Suspension për të cilën kjo kompani mban dhe autorizimin emergjent për tregtim. Sipas relacionit kjo vaksinë përmban të njëjtën substancë aktive (formulë), e cila prodhohet nga Sinovac Life Science Co ltd. Paketimi i vaksinës së propozuar kryhet në Turqi dhe jo më në Kinë, por sipas relacionit është e njëjtë me CoronaVac Covid-19 (Vero Cell) që prodhohet si produkt i përfunduar në Kinë.
Screenshot i Aktit Normativ të ndryshuar për marrëveshjen mbi vaksinat, datë 7 prill 2021
Meqë vaksina e re e sjellë nga kompania turke nuk qe e aprovuar nga vendi prodhues i vaksinës Kina, por vetëm nga shteti turk, u bë kjo shtesë e radhës e cila përbën ndryshimin e tretë radhazi të aktit normative për përdorimin e vaksinës anticovid, brenda më pak se një muaji.
Për të akomoduar përdorimin e kësaj vaksinë të paketuar në Turqi dhe jo më produkt i përfunduar në Kinë, u ndryshua përsëri neni 2 i aktit normativ nr.1, datë 10.1.2021, te Këshillit të Ministrave.
Tashmë nga:
Neni 2 – Aprovimi i Përdorimit të Vaksinës në Popullatë
Vaksinat anticovid-19 aprovohen për përdorim në popullatë bazuar në aprovimet e Food and Drugs Administration të Shteteve të Bashkuara të Amerikës (FDA) ose European Medicine Agency (EMA) të Bashkimit Europian ose të trupave të tjera certifikuese të vendeve që prodhojnë vaksina anticovid-19.
Në:
Vaksinat anticovid-19 aprovohen për përdorim në popullatë bazuar në aprovimet e Food and Drugs Administration të Shteteve të Bashkuara të Amerikës (FDA), European Medicine Agency (EMA) të Bashkimit Europian, të trupave të tjera certifikuese të vendeve që prodhojnë vaksina anticovid-19 si dhe vendeve të mbajtësit të autorizimit të tregtimit për vaksinat anticovid.
Screenshot i Aktit Normativ të ndryshuar për marrëveshjen mbi vaksinat, datë 9 prill 2021
Pra duke qenë që vaksina e re e sjellë nga Kompania Turke nuk qe e aprovuar nga vendi prodhues i vaksinës Kina, por vetëm nga vendi Turk, u bë kjo shtesë e rradhës parashtruar më lart.
