Skemat e mashtrimit në portale me mjekë të rremë, me qëllim shitjen e preparateve të ndryshme mbeten shumë krijuese. “Faktoje” verifikoi një tjetër rast të një produkti për pastrimine e enëve të gjakut, si këshilla e radhës e gënjeshtërt.
Në një artikull të publikuar më 10 maj, portalet kanë ofruar një preparat për pastrimin e enëve të gjakut, duke përdorur një person 97-vjeçar, i cili pretendohet se është kardiolog.
“Mosha – nuk është pengesë për jetën! Akademiku 97-vjeçar tregoi mbi sekretin e jetëgjatësisë dhe shëndetit të shkëlqyer”-shkruan portali që mban emrin ‘Happy Shop’.
Screenshot, artikulli i publikuar nga portali
Më tej portali shkruan se mjeku që mban emrin Endri Qamili, 97 vjeç tregon me detaje ‘metodën e tij për pastrimin e enëve dhe zgjatjen e jetës’.
Nisur nga interesi publik mbi çështjet shëndetësore, ne bëmë një verifikim të këtij artikulli që ofron këshilla mjekësore. Fillimisht bëmë një kërkim në internet në lidhje me këtë emër dhe nuk rezulton që në Shqipëri të ketë pasur një kardiolog të quajtur Endri Qamili. Përpos kësaj, kjo media online ka publikuar edhe një foto ku pretendohet se është mjeku 97-vjeçar. Ne bëmë një verifikim të saj, ku rezulton se imazhi është thjesht ilustrues dhe qarkullon kudo në internet në faqe të ndryshme ruse.
Vihet re se edhe në faqe të ndryshme në gjuhën ruse është përdorur kjo foto për të prezantuar preparate të ndryshme.
Gjitashtu, nga kërkimi online konstatuam se artikulli i faqes ‘Happy Shop’ është përkthyer nga këto faqe, pasi shumë elementë janë të njëjtë, me ndryshimin e vetëm që në këtë portal prezantohet si mjek shqiptar dhe me një tjetër preparat.
Agjencia e Barnave dhe Pajisjeve Mjekësore ka konfirmuar për Faktoje se preparate të tilla, në këtë rast ‘Hypertea’, nuk janë barna, por shtesa ushqimore.
Artikulli në fjalë është duke përdorur një model marketingu që krijon besimin tek medikamentet apo produktet e ndryshme që promovon duke i “shitur” ato si këshilla të mjekëve profesionistë. Në një sërë artikujsh, “Faktoje” ka treguar se si portale të caktuara dizinformojnë lexuesit, duke përdorur mjekë të rremë për shitjen e medikamenteve apo trajtimeve mjekësore të ndryshme.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
