Komisioni Qendror i Zgjedhjeve ka afishuar në disa stacione të transportit publik materiale edukuese për mënyrën sesi do të zhvillohet procesi i votimit në 25 prillit. Nga informacionet që Faktoje ka grumbulluar në terren na rezulton se një pjesë e mirë e qytetarëve në moshën mbi 60 vjeç janë të paqartë sesi do të votojnë. Kurse të rinjtë thonë se votimi është i thjeshtë edhe pse fleta e votimit është një risi.
Zgjedhjet për Kuvendin e Shqipërisë
Materialet Edukuese të vendosura në stationet e transportit publik urban nga Komisioni Qendror i Zgjedhjeve kanë në fokus informimin e publikut.
Në posterat edukues, përveç paralajmërimeve për sanksionet në rast të shkeljes së ligjit zgjedhor, ilustrohet mënyra sesi plotësohet fleta e votimit.
Materialet edukuese/informuese në stacionin e autobusëve pranë Librit Universitar
Stacion i autbusëve te “Komuna e Parisit”, Tiranë, 20 prill 2021
Si do të votosh?
-Paraqituni në qendrën e votimit me pasaportë dhe letërnjoftim.
-Tregoni letërnjoftimin ose pasaporten para komisionit të qendrës së votimit.
-Identifikohu përmes pajisjes së identifikimit elektronik.
-Merr fletën e votimit dhe sigurohu që ajo është e vulosur me 2 vula.
-Shko i vetëm në dhomën e fshetësisë.
-Shëno me një shenjë që tregon qartë zgjedhjen tënde vetëm për një nga subjektet zgjedhorë dhe vetëm për një nga kandidatët e tij.
-Palose fleten e votimit në dhomën e fshetësisë në mënyrë që zgjedhja të mos duket
-Hidh fleten e votimit në kutinë e votimit dhe largohu nga qendra e votimit.
Veprimet që përbëjnë vepër penale
-Shitja dhe blerja e votës, denohet me 1 deri në 5 vjet burg.
-Fotografimi i votës dhe shfaqja tek të tjetët, denohen me 3 muaj deri në 3 vjet.
-Votimi familjar, apo më shumë se një herë, denohen 1 deri në 3 vjet burg.
-Çdo veprim që cënon zgjedhjet si: votimi pa kryer identifikimin elektronik, kanosja, falsifikimi apo dëmtimi materialit zgjedhor, denohet nga 3 muaj deri në 7 muaj.
Stacioni i unazës, Tiranë 20 prill 2021
Të moshuarit, të paqartë për mënyrën si plotësohet fleta e votimit në 25 prill
Fleta e votimit u bë shkak për debat pasi propozimi i komisionerit Ilirjan Celibashi për vendosjen e emrave të kandidatëve u kundërshtua nga PS, e cila kërkonte identifikimin vetëm me numër si për subjekin ashtu edhe për kandidatin. Vendimi përfundimtar për miratimin e modelit të fletës së votimit u mor nga Kolegji Zgjedhor në fillim të muajit prill.
Modeli i fletës së votimit për,“Qarkun Tiranë”, 25 prill, 2021
Modeli i fletës së votimit, 25 qershor, 2017
Pavarësisht fushatës informuese të KQZ edhe në mjetet e komunikimit ka ende paqartësi për mënyrën sesi do të votohet.
Faktoje pyeti disa persona lidhur me këtë.
Një grua rreth të 60 e cila nuk pranoi të identifikohej, tha për Faktojen se votimi këtë vit është pak i vështirë dhe i paqartë për të në krahasim me zgjedhjet e mëparshme.
“Jemi informuar pak nga televizori, por unë personalisht votimin kësaj radhe e shoh disi të vështirë dhe të paqartë pasi jemi mësuar me dy fletë votimi, tani është vetëm një, i bie do të votoj për partinë dhe kandidatin.”-tha ajo.
Edhe të tjerë shprehen konfuzë për mënyrën sesi do të votojnë në 25 prill.
B.N, banor në Tiranë tha për Faktoje.
“Jam shumë i paqartë për mënyrën e votimit për zgjedhjet të 25 prillit, po sikur unë dua të votoj një X parti të caktuar edhe një kandidat të një partie tjeter X, vota imë është e pavlefshmë, jam konfuz”
Faktoje komunikoi me disa të rinj të cilët na komunikuan se janë informuar mbi mënyrën e votimit dhe risitë n fletën e votimit të miratuar për zgjedhjet e 25 prillit.
E.M, maturanti i cili do voton për hërë të parë, mendon se votimi për këto zgjedhje është i thjeshtë dhe me risi.
“Unë do të votoj për herë të parë dhe di si të votoj dhe cilat janë ato veprime që përbëjnë shkelje, mua më duket e thjeshtë madje do të kemi dhe një risi për këto zgjedhje e cila është apatatura e identifikimit”-tha E.M për Faktoje.
