Në çelje të sesionit 2020 të Kuvendit të Shqipërisë, kryetari i parlamentit Gramoz Ruçi, renditi tre përparësitë e parlamentit, të cilat duhej të plotësoheshin deri në korrik 2020.
Prioritetet e renditura nga kryeparlamentari Ruçi ishin: Çelja e negociatave për antarësimin në Bashkimin Europian, përfundimi i Reformës zgjedhore dhe ngritja e të gjitha organeve të drejtësisë.
Çfarë ndodhi me përparësitë e parlamentit këtë sesion?
Çelja e negociatave
Më 24 mars pas mbledhjes përmes një video-konference, ministrat e vendeve anëtare të BE-së kanë dhanë dakordësinë për çeljen e negociatave për antarësimin e Shqipërisë dhe Maqedonisë së Veriut në Bashkimin Europian.
Ministrat e Europës në video-konferencë për çeljen e negociatave
Çelja e negociatave vjen pas disa refuzimeve radhazi, ku më i fundit ishte ai në tetor të 2019-s.
Me këtë vendim të ministrave të vendeve të Bashkimi Europian, plotësohet një nga prioritetet që kryetari i Kuvendit Gramoz Ruçi artikuloi në janar të këtij viti. Po çfarë po ndodhi me dy prioritetet e tjera?
Reforma zgjedhore
Disa herë brenda këtij viti është mbledhur Këshilli Politik, që përfshiu edhe përfaqësues të opozitës jashtparlamentare, për reformën zgjedhore.
Më 5 qershor, pas debatesh e kundërshtish dhe me ndërmjetësimin e diplomatëve, palët firmosën një marrëveshje që më 23 korrik mori miratimin në Kuvend me 99 vota pro.
Në 30 korrik, gjatë seancës së fundit plenare për këtë sesion, u miratuan me 106 vota pro, nga maxhoranca dhe pjesa më e madhe e opozitës së ‘re’ edhe ndryshimet kushtetuese, për të cilat në fakt opozita jashtëparlamentare është shprehur kundër, duke i konsideruar si të njëanshme dhe në ‘shkelje’ të marrëvëshjes së 5 qershorit.
Organet e drejtësisë
Ngritja e të gjitha organeve të drejtësisë është ende një sfidë me të cilën përballet vendi ynë. Edhe pse ngritja e Gjykatës së Lartë dhe asaj Kushtetuese janë vendosur edhe si kushte nga BE-së për çeljen e negociatave, ato ende nuk janë funksionale, për arsye që nisën me vakancat dhe dorëheqjet pas procesit të vettigut dhe vijuan me konfliktin institucional të nisur më herët mes qeverisë dhe presidentit.
