MARJO BRAKA

Kryeministri Edi Rama, në fillim të muajit maj njoftoi se qeveria po përgatiste draft-propozimin për legalizimin e kanabisit për qëllime mjekësore. Ai tha se nisma do të miratohej brenda këtij sesioni parlamentar. Por nisma, as nuk u pasua nga një draft propozim dhe as kaloi për votim në Kuvend.

Kryeministri Edi Rama, në prani edhe të ambasadorit të Bashkimit Europian në Shqipëri, Luigi Soreca, më 9 maj, njoftoi:

“Kemi thuajse një vit që po punojmë për këtë dhe për pak ajo (nisma për legalizimin e kanabisit për qëllime mjekësore) do të jetë gati. Kështu që, shumë shpejt drafti do të jetë gati dhe do të hapet pastaj për diskutim publik”

Më 12 qershor, Rama u shpreh se pas hartimit të draft-propozimit, nisma do kalonte për miratim brenda këtij sesioni Parlamentar.

“Kemi një vit që punojmë me draftin. Ambicia është që ta kalojmë brenda këtij sesioni Parlamentar” – u shpreh Rama.

Mirëpo, edhe pse kryeministri Rama kishte deklaruar se qeveria prej një viti kishte punuar për hartimin e draft propozimit, ai nuk u paraqit kurrë për publikun.

Po ashtu, legalizimi i kanabisit mjekësor nuk kaloi për shqyrtim as në Komisionin e Ligjeve e aq më pak për votim në Parlament, I cili I mbylli punimet për këtë sesion, me seancën plenare të 30 korrrikut.

Propozimi i kryeministrit Edi Rama, u cilësua nga ekspertët si një nismë me rrezik të lartë për shkak të informalitetit ekonomik të vendit e mbi të gjitha brishtësisë së institucioneve në vend.

LEXO EDHE: https://faktoje.al/tirane-ligjerimi-i-kanabisit-mjekesor-dhe-informaliteti-i-ekonomise-shqiptare/