Lajmi i publikuar online për kurën e nuhatjes së borzilokut që mund të bëjë mrekulli ndaj tumorit është një keqintepretim dhe nuk bazohet në studime të mirëfillta shkencore. Do të ishte e tepërt të kujtonim se nuhatja, pra aroma, nuk mund të trajtojë sëmundjet qelizore kancerogjene.
——————
Titulli i portalit onlinenews5.com jep lajmin e mirë: “Mjafton që të nuhatet”, bima e cila bën mrekulli kundrejt këtyre 4 llojeve të tumoreve”
Bima e mrekullive e reklamuar nga artikulli është borziloku modest. Pasi rradhit një sërë vetish të kësaj bime, brendësia e artikullit nuk përmend në asnjë fjali se si nuhatja e kësaj bime supozohet të luftojë tumoret.
Në një pjesë të tij, artikulli flet për “veprimin kundër kancerit”, ku ai flet për një lloj specifik borziloku, ‘borziloku i shenjtë’ (Ocimum tenuiflorum), i cili, sipas një përmbledhjeje të literaturës shkencore, për të cilën nuk jepet asnjë referencë, arriti “në përfundimin se fitokimikatet e borzilokut mund të ndihmojnë në parandalimin e disa llojeve të kancerit të lëkurës, mëlçisë, gojës dhe mushkërive”
Megjithatë, vetë artikulli e pranon se “studimet ishin paraklinike ose të kryera në kafshë, kështu që një konfirmim i efektit të borzilokut kërkon hetime të mëtejshme.”
Megjithëse disa studime kanë gjetur se ekstrakti i borzilokut ofron një burim të mirë përbërjesh bioaktive për parandalimin dhe trajtimin e kancerit, kjo nuk është testuar në prova klinike me njerëz. Për më tepër, asnjë nga këto studime nuk përmend nuhatjen si mënyrë trajtimi.
Siç duket, atëherë, titulli sensacionalist i vendosur nga portali ngre pritshmëritë tek lexuesit për të mbledhur sa më shumë klikime.
Kjo nuk është hera e parë që ky portal shpërndan këshilla të tilla keqinformuese lidhur me kura çudibërëse mjekësore.
