Qendra “Faktoje” prej 5 tetorit 2023 është anëtare e verifikuar e Rrjetit Europian të Standardeve Fact Checking (EFCSN). Anëtarësimi në këtë rrjet i tregon publikut se cilat organizata europiane fact-checking operojnë të pavarura, etike dhe me përkushtimin për t’i shërbyer interesit publik.
Faktoje e vetmja media shqiptare, ka arritur të plotësojë kriteret e Kodit të Standardeve Europiane ku përfshihen cilësia e burimeve, paanshmëria dhe transparenca financiare. (Klikoni këtu për t’u njohur me Kodin e Standardeve).
Pse është i rëndësishëm?
Anëtarësimi në Rrjetit Europian të Standardeve të Verifikimit të Fakteve vërteton se Faktoje i përmbahet standardeve të larta Europiane në verifikimin e fakteve.
EFCSN përfshin mes një numri të përzgjedhur organizatash fact-checking europiane edhe agjencitë e lajmeve AFP, DPA dhe shërben si një certifikatë e besueshmërisë dhe transparencës për organizatat që kontrollojnë informacionin në Evropë.
Logoja e EFCSN përfshihet në faqen zyrare të Faktoje, së bashku me logon e IFCN, Rrjeti Global i Verifikimit të fakteve, ku jemi pjesë prej 3 vitesh.
Çfarë përfiton publiku?
Besueshmëri dhe Saktësi: Më të angazhguar për të siguruar saktësi dhe profesionalizëm në verifikimin e informacionit.
Bashkëpunim dhe ekspertizë: Në një komunitet që i beson dhe i përmbahet të njëjtave parime dhe vlerave të gazetarisë, shkëmbejmë përvoja dhe përmirësohemi për të informuar dhe ndërgjegjësuar publikun.
Ndikimi Pozitiv: Kontribut në luftën kundër dezinformimit, duke bërë një ndryshim të vërtetë dhe pozitiv në shoqërinë tonë.
Pak histori për EFCSN
EFCSN nisi si projekt i Call of Integrity of Social Media i Komisionit Europian dhe udhëhiqet nga 6 organizata europiane të përkushtuara në luftën kundër dezinformimit: Fundación Maldita.es (Spanjë), AFP (Francë), CORRECTIV (Gjermani), DEMAGOG (Poloni), Pagella Politica/ Facta (Itali) dhe EU DisinfoLab (Belgjikë).
Faktoje iu bashkua këtij projekti më shumë se një vit më parë, bashkë me organizata fact-checking nga 30 vende të Europës, si pjesë e grupit të punës, për hartimin dhe miratimin e Kodit Profesional Europian të Standardeve, në kuadër të luftës kundër dezinformimit.
Kodi qe rezultati i një pune disamujore kërkimore, anketash, debatesh dhe diskutimesh mes organizatave fact-checking europiane, në bashkëpunim me akademikë dhe ekspertë të fushës.
Ky kod tani shërben si kushtetuta e organizatave faktverifikuese që aspirojnë të anëtarësohen në Rrjetin Europian, EFCSN dhe janë të përkushtuara për t’i shërbyer interesit publik. Për anëtarësimin në këtë rrjet, organizatat aspiruese i nënshtrohen një verifikimi të hollësishëm dhe të gjithanshëm nga ekspertë vendas dhe ndërkombëtarë për standardet e gazetarisë dhe transparencën financiare, çdo dy vjet.
