Pretendimi: Qytetari sulmon live studion ku po zhvillohej intervista e artistes Tinka Kurti
Verdikti: Satirë
Pamjet e skenës së dhunës në studion ku po intervistohej aktorja Tinka Kurti, janë thjeshtë një kamera e fshehtë. Video e shpërndarë ka ngjallur mjaft reagime dhe zemërim te ndjekësit në rrjetet sociale.
Një video e shpërndarë në rrjetet sociale tregon një moment “sulmi”, teksa në një studio profesionale po intervistohej aktorja e njohur, Tinka Kurti. Postimi që shoqëron videon thuhet se një qytetar sulmon live studion, duke i ftuar ndjekësit online që të shohin videon.
“Qytetari sulmon live studion ku po zhvillohej intervista e artistes Tinka Kurti”-shkruhet në faqen e Facebook të “Zjarr Televizion”.
Video ka marrë mbi 140 mijë shikime dhe qindra komente, duke ngjallur edhe zemërim te shumë komentues.
Në fakt, e gjithë situata është një skenë e krijuar nga vetë televizioni, pasi bëhet fjalë për një kamera të fshehtë. Video tregon një burrë gjysëm të zhveshur, me mbrojtësen dhe dorezat e boksit, i cili shfaqet dhunshëm në studion radiofonike ku po intervistohej aktorja Tinka Kurti. Pasi përleshet dhunshëm me një teknik dhe moderatoren, boksieri i panjohur ndalet përballë aktores që ndodhet në një gjendje shock-u dhe mundohet ta qetësojë.
Teksa vijon “përplasja” mes tyre, në fund në studio futet gazetari Ismet Drishti, i cili njihet për krijimin e këtyre kamerave të fshehta. Ai qëndron i qetë dhe i ulur, duke ndjekur të gjithë skenën.
Video e ndarë në profilin në Facebook të “ZjarrTv” duke mos dhënë detaje se bëhej fjalë për një kamera të fshehtë apo satirë ka tërhequr klikime të shumta.
Mirëpo, nuk kanë munguar edhe reagimet negative nga ndjekësit online, të cilët e kanë vlerësuar si “gazetari poshtëruese” këtë situatë ndaj aktores së mirënjohur dhe në një moshë tashmë të madhe për të përballuar emocione të tilla.
