‘Resorti dimëror dhe pista e skive në Korçë’

Si u riciklua premtimi me imazhe 3D

376

Sotiraq Filo është një nga kryebashkiakët më jetëgjatë në krye të Bashkisë Korçë. Por drejtimi i kësaj bashkie prej një dekade duket se nuk i ka mjaftuar për të përmbushur premtimin e tij të hershëm për ndërtimin e një resorti dimëor dhe pistën e skive në Korçë. Edhe në zgjedhjet e fundit lokale, Filo ricikloi të njëjtin premtim. Këtë herë të kuruar përmes imazheve 3D. 

Esmeralda Topi 

‘Një Resort Dimëror fantastik së bashku me Skipistën do i shtohen Korçës si një vlerë e jashtëzakonshme për turizmin dhe sportet dimërore. Ndërtimi i tyre në një nga zonat më të bukura malore të Korçës do të jetë një potencial për turizmin rajonal dimëror dhe do të ndikojë në zhvillimin e zonës dhe rritjen e të ardhurave nga ky sektor’, premtonte në prag të zgjedhjeve lokale të 14 majit, Sotiraq Filo, kandidat i Partisë Socialiste, fitues i mandatit të tretë për kreun e bashkisë Korçë. 

Postimi në profilin e tij zyrtar në Facebook mban datën 11 maj 2023 dhe premtimi shoqërohet me një galeri fotografish 3D të cilat tregojnë se si do të duket Resorti Dimëror dhe Pista e Skive. 

Imazhet e kuruara kanë nxitur dhjetra ndjekës të komentojnë. Disa prej tyre hamendësojnë mbi vendndodhjen e këtij projekti.

  • “Në mal të thatë, me pamje magjepsëse të Prespës. Është vend fantastic dhe dëborë pa masë.”, shkruan një komentues. 
  • “Për në Moravë bëhet fjalë…?”, pyet një tjetër. 

Bashkia s’ka para për të përmbushur premtimin

Ndonëse është një nga premtimet më me peshë të Sotiraq Filos gjatë fushatës elektorale, projekti për Resortin Dimëror dhe Pistën e Skive, veç imazhe 3 D nuk ka asnjë detaj tjetër.

Për këtë arsye, ne ju drejtuam me një kërkesë për informacion Bashkisë së Korçës lidhur me premtimin e kryebashkiakut Filo.

Kërkesa për informacion drejtuar Bashkisë Korçë, 13 shtator

Bashkia e Korçës pranoi për Faktoje se ende nuk ka gjetur mënyrën e financimit të këtij projekti. Madje nuk ka të përcaktuar as vendndodhjen e Resortit Dimëror bashkë me Pistën e Skive.

“Bashkia Korçë është në biseda me donatorë dhe investitorë potencialë për identifikimin e vendit më të përshtatshëm për zhvillimin e këtij sporti dimëror.”, përgjigjet Bashkia për Faktoje.

Pse është i rëndësishëm projekti

Zak Topuzi nga Shoqata e Hoteleri-Turizmit thotë se ngritja e një resorti dimëror në zonën e Korçës, bashkë me një pistë skish, do t’i jepte impulsin e munguar turizmit dimëror.

“Një nga mangësitë më të mëdha që ka Shqipëria janë sportet e dimrit. Deri tani çështja e pistave është pjesa kryesore. Pasi po nuk investove në pista, nuk mund te investosh dhe në resorte. Dhe Korça kompletohet pastaj për një turizëm 365 ditë.”, thotë Topuzi teksa vë në dukje mungesën e turizmit dimëror në Shqipëri. 

“Turizmi i dimrit është pika më e dobët që ne kemi, krahasuar me rajonin. Pasi 65% të turistëve vijnë në 5-6 muaj, pjesët e tjera të vitit janë bosh. Për shembull, Kosova dhe Mali i Zi kanë investuar për turizmin e dimrit. Mali I Zi tani ka ndërtuar pesë resorte në Kolashin, nga më luksozët në Europë.” 

Premtim i ricikluar ndër vite

Ndërtimi i një resorti dimëror në Korçë, bashkë me një pistë skish është një tjetër premtim i nxjerrë nga sirtarët e pluhurosur të zotimeve të bëra ndër vite nga Sotiraq Filo. 

I njëjti premtim ka qënë në lupën e Faktoje edhe përgjatë zgjedhjeve të tjera. Në 2015 Filo premtonte ndërtimin e pistës së skive dhe kompleksit turistik dimëror në Dardhë dhe Voskopojë. Tetë vite më vonë, Filo ka një projekt me fotografi 3D, por nuk ka as paratë dhe për më tepër nuk ka të qartë as vendndodhjen e tij.

Përfundim

Bazuar në informacionet e mbledhura dhe verifikimet në terren, premtimin e kryetarit të Bashkisë së Korçës, Sotiraq Filo, për Resortin Dimëror dhe Skipistën, do ta kategorizojmë të pambajtur. 

*Faktoje, e mbështetur nga National Endoëment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.