Shëtitorja e Durrësit, e prezantuar si një projekt madhor për transformimin e qytetit bregdetar nuk është ende gati, pavarësisht premtimeve për përfundimin e saj në muajin maj të këtij viti. Projekti me vlerë rreth 285 milionë lekë, që ka njësi zbatuese FSHZH-në, nisi në shtator 2022 dhe planifikohej të përfundonte në maj-qershor 2023. Faktoje bëri një verifikim në terren ku puna në kantierin e ndërtimit vijonte, ndërsa sezoni turistik është në prag.
Ilda Hoxha
“Si afat kemi parashikuar të përfundojë brenda sezonit të ardhshëm turistik. Në vitin e ardhshëm ne do të kemi një shëtitore shumë të bukur në këtë zonë”, deklaroi Sako më 25 tetor 2022.
“Mendojmë ta mbarojmë brenda afateve kohore, për një periudhë 8-mujore, deri në maj”, theksoi inxhinieri i punimeve.
Po në tetor të vitit që lamë pas, kryetarja e Bashkisë së qytetit bregdetar foli në lidhje me projektin. “Faza e parë shtrihet pothuajse në gjysmë të projektit dhe faza e dytë pastaj nga atje ku mbaron faza e parë, deri të Ura e Dajlanit“, sqaroi kryebashkiakja e Durrësit një ditë më vonë.
Ndërsa, e ftuar në Top Story Sako nuk dha afate për përfundimin e projektit, por theksoi: “Është një projekt që ka filluar, me fondet e qeverisë shqiptare, është faza e parë që do të lidhë nga Kavaleshenca deri në zonën e Portit…Do të bëjmë të mundur edhe rehabilitimin e të gjitha fasadave në vijën e parë”.
Në nëntor 2022, Fondi Shqiptar i Zhvillimit bëri të ditur zyrtarisht për Faktoje se vlera e kontratës për projektin është 284,962,076.18 lekë pa TVSH dhe afati i punimeve ishte 9 muaj kalendarikë nga data e fillimit të tyre. Sipas FSHZH, data e fillimit të punimeve është 28.09.2022 dhe si periudhë e përfundimit parashikohej muaji qershor.
“Fondi Shqiptar i Zhvillimit luan rolin e Agjencisë Zbatuese në projektin për transformimin urban në hapësira publike kryesore (Rajoni 1 dhe 2) – ndërtimi i shëtitores së Plazhit nga Ura e Dajlanit deri në godinën e Kavalishencës. Ky projekt parashikon krijimin e hapësirave rekreative, të cilat do të bëjnë të mundur realizimin e një sërë aktivitetesh nga qytetarët, ku përfshihen çiklizmi dhe vrapimi, që do të mundësohen nga ndërtimi i shëtitores lineare përgjatë gjithë shtrirjes së plazhit me korsitë e dedikuara. E gjithë zona do të ketë kënde lojërash për fëmijë, nyje argëtimi dhe breza të gjelbëruar”, sqaronte FSHZH në muajin nëntor 2022.
Por, si po ecin punimet për ndërtimin e shëtitores së Durrës, i cilësuar si një projekt madhor nga kryeministri Edi Rama dhe kryebashkiakja e Durrësit, Emiriana Sako?
Faktoje iu drejtua me një kërkesë për informacion Fondit Shqiptar të Zhvillimit, ku ndër të tjera e pyetëm kur pritet të përfundojnë punimet për shëtitoren.
Kërkesa për informacion dërguar FSHZH, 27 prill 2023
Zyrtarisht, FSHZH bën të ditur për Faktoje detaje në lidhje me ecurinë e projektit.
“Në lidhje me projektin që FSHZH po zbaton në Durrës, për transformimin urban në hapësira publike kryesore (Rajoni 1 dhe 2) – ndërtimi i shëtitores së plazhit nga Ura e Dajlanit deri në godinën e Kavalishencës, ju bëjmë me dije se punimet po ecin me ritme të mira dhe pritet të përfundojnë brenda afatit të kontratës. Më poshtë, gjeni të specifikuara fazat ku ndodhen punimet:
Ka përfunduar shtresa e betonit për 84% të gjatësisë së shëtitores.
Është bërë përpunimi sipërfaqësor për rreth 43% të gjatësisë totale.
Është hedhur shtresa e stabilizantit në gjatësinë 1 km në pjesën ku do të bëhet korsia e biçikletave”, njofton FSHZH.
Për të parë nga afër ecurinë e punimeve, Faktoje bëri një verifikim në terren më 3 maj, në zonën ku po ndërtohet shëtitorja e re e Durrësit. Ajo që vihet ishte se e gjitha zona prej 3 km ishte ende një kantier i hapur ndërtimi, me makineri dhe grumbuj rëre gjithandej.
Shëtitorja në Durrës, 3 maj 2023
Të pyetur nga Faktoje, qytetarë konfirmojnë se ende nuk ka një përfundim të punimeve, ndërsa në javët e fundit kishin vënë re shtim të mjeteve dhe punonjësve në kantierin e ndërtimit.
Shëtitorja në Durrës, 3 maj 2023
“Siç e shikoni dhe ju, nuk duket gjë që të ketë përfunduar. Urojmë të jetë gati për sezonin, por nga ajo që shohim, duket e vështirë që të përfundojë”, thotë Roza, banore e Durrësit.
“Kur nuk e mbaruan për 8 muaj, nuk besoj ta përfundojnë tani për 1 muaj. Është investim i madh, kërkon kohë, deri tani nuk duket gjë në vijë”, shprehet një tjetër qytetar.
Shëtitorja në Durrës, 3 maj 2023
Përpos ndërtimit të shëtitores, është premtuar edhe rregullimi i fasadave të objekteve në vijën e parë, por nga verifikimi në terren konstatuam se deri më tani nuk ishte bërë asgjë në këtë drejtim.
Shëtitorja në Durrës, 3 maj 2023
Në një dalje për mediat nga selia e Partisë Socialiste më 15 maj, Emiriana Sako reagoi për herë të parë pas fitores në Durrës. Gjatë fjalës së mbajtur, Sako e vuri theksin te turizmi. “Do të fillojmë që nesër me përgatitjet për sezonin turistik”, deklaroi kryebashkiakja e Durrësit.
Në muajin nëntor, Faktoje raportoi mbi nisjen e punimeve për “Lungomaren” e Durrësit dhe se shëtitorja duhej të ishte gati këtë sezon turistik. Projekti për shëtitoren është në fakt kompetencë e qeverisë, megjithatë ky nuk është rasti i parë kur kryebashkiakët joshin qytetarët me premtimet madhore, afatet e të cilave zvarriten përtej planifikimit.
Ky shkrim u publikua në kuadër të projektit “Nxitja e llogaridhënies së zyrtarëve të lartë” mbështetur nga National Endowment Democracy (NED) dhe zbatuar nga Faktoje.
