JOEL ÇELA

Pas deklarimit publik të identifikimit të dy rasteve të para me COVID -19, në Shqipëri, qindra qytetarë kanë shkuar drejt supermaketeve për të blerë ushqimet e shportës, oriz, miell, makarona, vaj, sheqer, ujë, dhe qumësht, por në sasi më të mëdha se zakonisht.  Faktoje shkoi në disa rrjete marketesh të Tiranës, ku konstatoi rafte të boshatisura nga produktet e sipërpërmendura.

“Fluksi ka qenë i madh përgjatë gjithë ditës. Qytetarët kanë blerë ushqimet e shportës në sasi shumë më të mëdha se zakonisht. Të paktën 20 persona kanë bërë blerje që e tejkalonin vlerën e 100 mijë lekëve të vjetra, ndërsa një zonjë ka blerë 250 mijë lekë furnizime.” shprehet L.K, arkëtare në një nga marketet më të mëdha në Tiranë.

E njëjta situatë na u konfirmua edhe nga pronari i një pike shumice në rrugën e Elbasanit, i cili tha për Faktoje se nuk e mbante mend numrin e qytetarëve që e kishin tejkaluar vlerën e 100 mijë lekëve të vjetra, pasi ishin të shumtë:

“Klientët tanë që i njohim kanë ardhur dhe kanë blerë sa kanë mundur. Produktet që zakonisht i marrin me qese, sot i kanë blerë me koli. Nuk kanë pushuar gjithë ditën dhe them se pasdite do ketë më shumë, ngaqë në mëngjes janë në punë. Nuk e di të sigurtë sa persona kanë blerë mall mbi 100 mijë lekë, por kanë qenë shumë, me dhjetëra. Një zonjë erdhi dhe bleu 150 mijë lekë produkte vetëm pak më parë”.

Masat e marra nga qeveria, në kuadër të COVID -19, për të shmangur grumbullimet ka sjellë panik tek qytetarët, të cilët kanë vrapuar drejt supermaketeve. I njëjti fenomen u vërejt edhe në zonat më të prekura nga koronavirusi në Itali.