Kundërshtimi i Papë Françeskut për të lejuar një peshkop afrikan t’i puthë dorën po interpretohet në rrjet si racizëm. Verifikimi i “Faktoje” sqaron se ka vite që Papa nuk lejon besimtarët t’i puthin duart për të shmangur përhapjen e sëmundjeve në këtë mënyrë.
————————-
Një video që tregon Papë Françeskun duke refuzuar të lejojë një peshkop t’i puthë dorën po shpërndahet në rrjet për të insinuar se kjo sjellje vjen si rezultat i racizmit të Papës. Deri në momentin e publikimit të këtij shkrimi, video është parë mbi 5 mijë herë.
Megjithatë, kjo video është nxjerrë nga konteksti.
Ky nuk është rasti i parë që Papë Françesku ka refuzuar apo hezituar t’i lejojë besimtarët t’i puthin unazën. Në Mars të 2019, ai shmangu përpjekjet e besimtarëve për t’i puthur unazën në Loreto, Itali. Ky reagim u bë viral në rrjete sociale dhe u kritikua nga disa katolikë konservatorë.
Në 2019, një zëdhënës i Vatikanit shpjegoi: “Ati i Shenjtë më tha se motivi ishte shumë i thjeshtë: higjena. Ai do të shmangë rrezikun e shpërndarjes së mikrobeve për njerëzit, jo për atë vetë.”
