Një video që tregon zbarkimin e një avioni luftarak mbi një aeroplan-mbajtëse po shitet në rrjet si provë e manovrave mbresëlënëse të pilotëve rusë. Verifikimi i “Faktoje” zbuloi se video në fjalë është në të vërtetë nga një video-lojë.
——————————–
Një video që tregon një avion luftarak duke zbarkuar mbi një luftanije po qarkullon në rrjetet sociale si shfaqje e kapaciteteve të aviacionit rus.
Me anë të një kërkimi në motorin e kërkimit të imazheve Google Reverse Image Search, “Faktoje” zbuloi se kjo video ishte postuar në TikTok me titullin “DCS: Ulja Cobra (me Sukses) e Su-27 mbi Aeroplan-mbajtëse.”
Një kërkim tjetër në Google zbulon se DCS është akronimi për Digital Combat Simulator (Simulator Dixhital Lufte), një video-lojë në të cilën simulohen beteja ajrore.
Su-27 është një lloj avioni luftarak me origjinë sovjetike, i cili ekziston vërtet. Bazuar mbi të, është dizenjuar dhe modeli Su-27 në video-lojën DCS, të cilin lojtarët mund ta blejnë për $14.99.
Manovra Cobra, simulimi i së cilës tregohet në video, është një manovër e vërtetë. Ajo mund të përdoret, teorikisht, në betejë ajrore për të ndaluar momentalisht avionin, duke bërë një avion ndjekës të kalojë përpara tij, si në videon e mëposhtme, por e vështirë që të përdoret për një ulje në pistën e reduktuar të një anijeje. Ajo performohet kryesisht në shfaqje me avionë dhe nuk ka raste të dokumentuara kur është përdorur në beteja të vërteta.
![](https://faktoje.al/wp-content/uploads/2023/06/SAAB_35_Draken_performing_the_Cobra_maneuver.gif)
Lufta në Ukrainë është shoqëruar me një sërë rastesh kur klipe video-lojrash janë ngatërruar apo keqinterpretuar si video të ngjarjeve të vërteta. Në Shkurt 2022, vetë Ministria e Mbrojtjes së Ukrainës shpërndau një video të krijuar me DCS si të ishin pamje nga lufta në Ukrainë.