Pak ditë më parë lajmi për shkarkimin e kryetarit të komunës së Preshevës, Shqiprim Arifi u publikua thuajse copy-paste në shumë media shqiptare ku mbizotëroi titulli: “Vuçiç shkarkon kryetarin e komunës së Preshevës”. Por një verifikim i Faktoje tregoi se raportimi u servir në formën e një narrative dezinformuese. Shumica e mediave iu referuan vetëm postimit të zotit Arifi, pa marrë në konsideratë burimet e tjera për të verifikuar lajmin.
Jona Plumbi
Kryetari i fundit i Komunës së Preshevës, Shqiprim Arifi, akuzoi autoritetet në Beograd për largim “të dhunshëm” si dhe “diskriminim të shqiptarëve”.
Lajmi u pasqyrua gjerësisht nga mediat shqipfolëse. Pjesa më e madhe e tyre cituan deklaratën e Arifit, të publikuar në rrjetin social Facebook.
Vuçiç shkarkon kritikun e Kurtit/ Shqiprim Arifi: Vijon tradita e Millosheviçit
“Duke mos ndjekur asnjë procedurë ligjore, si dhe pa asnjë njoftim zyrtar, regjimi serb dhe antishqiptar duke vazhduar traditën e Millosheviçit të viteve të 90 ta, në mënyrë të dhunshme më shkarkuan nga posti i Kryetarit të Komunës së Preshevës”, – cituan mediat.
Vuçiç shkarkon kryetarin e Komunës së Preshevës, Shqiprim Arifi
Vuçiç shkarkon kryetarin e Komunës së Preshevës, Shqiprim Arifi
Lajmi mori forma të ndryshme akuzash ndaj arsyes se përse Arifi ishte shkarkuar, duke aluduar nga përfshirja e kryeministrit të Kosovës Albin Kurti në këtë proces, deri tek arsyetimi se shkarkimi kishte ardhur për shkak të shfaqjes së flamurit shqiptar në komunën e Preshevës.
Shqiprim Arifi: Njerëzit e Kurtit bashkëpunuan me Vuçiç për të më shkarkuar
Në mungesë të kontekstit ky informacion të bën të mendosh se ka qënë Aleksandar Vuçiç ai që ka shkarkuar Shqiprim Arifin, për shkak se ky i fundit ka ngritur flamurin shqiptar në godinën e komunës, apo se ky i fundit ka kritikuar Kurtin.
Raportimi i njëanshëm i akuzave, veçanërisht atyre politike, shpesh çon në keqkuptime të thella.
Pak kontekst i jep një tjetër kuptim situatës. Një pikënisje e mirë është vetë ligji për vetëqeverisjen vendore në Serbi, që shpjegon mënyrën sesi zgjidhet kryetari i komunës.
Në Serbi, kryetarët e qyteteve apo komunave nuk zgjidhen në mënyrë të drejtpërdrejtë.
Procedura funksionon kështu: Në zgjedhjet lokale qytetarët në Serbi votojnë për të zgjedhur asamblenë e qytetit apo komunës. Më pas është kjo asamble ajo që zgjedh kryetarin e saj. I zgjedhuri konsiderohet si kryetar i qytetit apo komunës.
Pra, qeveria e Serbisë, e përfaqësuar nga kryetari i asamblesë kombëtare, është përgjegjëse për shpalljen e zgjedhjeve lokale, në një anë, si dhe shpërberjen e asamblesë parlamentare locale.
Kjo përcaktohet në nenin 86 të Ligjit për qeverisjen lokale (Zakon o lokalnoj samoupravi).
Ajo që ka ndodhur është se pasi janë shpallur zgjedhjet e reja për Beogradin dhe shumë komuna të tjera për në datën 2 qershor, Shqiprim Arifi është një nga zyrtarët që humbi postin pas shkrirjes së asamblesë parlamentare të komunës.
Këto komuna dhe qytete do të drejtohen nga një qeveri teknike deri në zgjedhjen e një asambleje të re të dalë nga votimet e pritshme të qershorit.
Në anën tjetër, Ragmi Mustafa, i cili është emëruar nga Qeveria e Serbisë si kryetar i Autoritetit të Përkohshëm që do të drejtojë Preshevën deri në mbajtjen e zgjedhjeve, thotë se Kuvendi vendor i Preshevës nuk ishte mbledhur prej korrikut 2023 dhe se kjo është arsyeja e shpërbërjes së tij.
“Koalicioni i mëparshëm i mbledhur rreth Alternativës për Ndryshim të Shqiprim Arifit e humbi shumicën në Kuvend dhe për nëntë muaj nuk mund të thërrasë asnjë seancë”, tha Ragmi Mustafa për Radion Evropa e Lirë.
Në vendimin e qeverisë së Serbisë për shpërndarjen e Kuvendit të Preshevës, të publikuar në fletoren zyrtare të datës 19 prill, thuhet se qeveria i është referuar pikërisht nenit 86 të sipërcituar, si dhe nenit 85 paragrafi 1 ku thuhet se kuvendi lokal mund të shpërndahet nëse nuk mblidhet më shumë se tre muaj.
Arifi, deri tani, nuk e ka kundërshtuar këtë pretendim të qeverisë serbe.
Pavarësisht qëndrimeve të politikanëve, mediat kanë për mision dhënien e informacionit të plotë dhe të vërtetë. Kjo pamundësohet kur raportimi limitohet në pasqyrimin e njërës anë, duke mos dhënë kontekstin ku zhvillohet ngjarja, apo edhe qëndrimin e palës tjetër.
Rasti i shkarkimit të kryetarit të komunës së Preshevës, Shqipërim Arifi është një shembull i faktit se në mungesë të kontekstit dhe ofrimit të njohurive të plota mbi rastin, informacioni mund të sjellë keqkuptim tek lexuesit.
