Më 9 dhjetor 2022, portal online IndeksOnline ka publikuar një artikull me titull: LAJMI I FUNDIT: Arrestohet i dyshuari që qëlloi zyrtarin policor në Veri. Artikulli më pas është marrë i gatshëm nga portale të tjera në Shqipëri dhe Kosovë, pa verifikuar vërtetësinë e informacionit. “Faktoje” vërtetoi se arrestimi i të dyshuarit, nuk ka të bëjë me ngjarjen e ndodhur në komunën e Zveçanit.

Jona Plumbi

Ngjarja e ndodhur në veri të Kosovës ku një polic u lëndua pas një sulmi me armë zjarri në komunën e Zveçanit, ka zënë tituj kryesorë këtë fundjavë. Media onlinë në Kosovë, IndeksiOnline publikoi një artikull ku njoftonte “Arrestimin e të dyshuarit që qëlloi zyrtarin policor në Veri.”

Për vërtetësinë e pretendimit, IndeksiOnline ofronte një “burim” të paidentifikuar. Ky lajm më pas është ripublikuar nga media të ndryshme, pa verifikuar vërtetësinë e informacionit.

“Faktoje” vërtetoi se në fakt, në datën 8 dhjetor 2022, Policia e Kosovës ka arrestuar në Jarinje një të dyshuar me iniciale M.A. Por, sipas vetë njoftimit të policisë kosovare, “Personi i ndaluar është i dyshuar për përfshirje në sulm me armë zjarri ndaj personave zyrtarë, ‘vrasje e rëndë (në tentativë)’, rast ky i kryer kohë më pare”.

Vërtetimin e këtij informacioni e kanë bërë edhe në Kosovë kolegët tanë të “Kallxo.com” të cilët kanë kontaktuar policinë e Kosovës duke kofirmuar edhe njëherë faktin se i arrestuari nuk ka të bëjë me sulmin ndaj policisë të datës 9 dhjetor 2022.

E ndërsa një pjesë e mirë e portaleve online përhapin keqinformim duke kopjuar dhe publikuar informacione të paverifikuara, ka edhe nga ata të cilët përhapim informacione të gabuara qëllimisht. I tillë duket rasti i shqip.com, e cila ndryshe nga mediat e tjera, e ka përfshirë njoftimin e policisë së Kosovës në artikull, por duke dhënë informacion të rremë.

Sipas Policisë së Kosovës është arrestuar personi i dyshuar i cili ishte në kërkim për plagosjen e policit mbrëmë në Zveçan. – kështu e nis artikullin shqip.com duke vijuar me njoftimin e policisë ku thuhet qartë arsyeja e arrestimit të këtij personi, që nuk ka lidhje me sulmin e ndodhur në 8 dhjetor 2022.

Fatkeqësisht, praktika e shpërndarjes së informacioneve të marra të gatshme, pa u siguruar më parë për vërtetësinë e tyre, luan rol kyç në keqinformimin e qytetarëve. Tema “të nxehta” si kjo e marrëdhënies Kosovë – Serbi, të cilat duhet të trajtohen me kujdes të veçantë nga gazetarët e të gjithë mediumeve, pasi kanë edhe ndikimin më të madh tek publiku, në fakt kthehen në “karrem” për klikime dhe në burim keqinformimi.

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin

*imazhi i përdorur është marrë nga Radio Evropa e Lire