Pasi revista amerikane Time shpalli presidentin ukrainas Volodymyr Zelensky “Njeriun e Vitit” 2022, disa portale e kanë krahasuar këtë ngjarje me shpalljen e diktatorit gjerman Adolf Hitler për të sajuar një paralelizëm mes të dyve. Verifikimi i “Faktoje” zbuloi se këto krahasime nuk përfshijnë kontekstin e plotë të titullit “Njeriu i Vitit”.

——————————-

Portali mast.al pretendon se “Zelenski u shpall “Personi i Vitit” nga revista TIME duke ndjekur hapat e Hitlerit në vitin 1938,” në një artikull që kryesohet nga një foto e modifikuar e kopertinës së revistës Time, ku presidentit ukrainas i është vendosur në ballë simboli i përdorur nga nazistët, swastika. Kjo e vendos këtë artikull brenda një prej narrativave më të përhapura nga propaganda ruse për të justifikuar luftën në Ukrainë, ajo e Ukrainës si shtet nazist.

“Presidenti Volodimir Zelenski shpallet “Personi i Vitit” nga revista TIME,” deklaron artikulli. “Adolf Hitlerit është nderuar me të njëjtin titull nga e njëjta revistë në vitin 1938.”

Megjithëse është e vërtetë që Adolf Hitler ka marrë të njejtin titull nga revista Time në 1938, vështirë të thuhet se është “nderuar” me të njejtin titull. Në artikullin që shoqëroi shpalljen e Hitlerit si “Njeriu i Vitit” në 1938, shkruhej: “Një brez përpara, qytetërimi perëndimor dukej se i kishte lënë pas të ligat kryesore të barbarizmit, me përjashtim të luftës mes kombeve. Revolucioni Komunist Rus promovoi të ligën e luftës së klasave. Hitleri ia kaloi me një të ligë tjetër, luftën e racave.”

“Gjenitë e vullnetit të lirë janë mbytur kaq shumë nga shtypja e diktaturës sa prodhimi gjerman i poezisë, prozës, muzikës, filozofisë, dhe artit ka qenë vërtet i mjerueshëm,” vijon Time. “Njeriu më shumë përgjegjës për këtë tragjedi botërore është një asket i zymtë, temperamental, jo tërheqës, 49-vjeçar, lindur në Austri, me një mustaqe si Charlie Chaplin”

Vetë kopertina e revistës Time, në numrin që shpalli Hitlerin “Njeriu i Vitit”, është një ilustrim grotesk ku Hitleri i vogël tregohet duke luajtur një organo mbi të cilën ka një rrotë torture nga varen trupa njerëzish. Diçitura shkruan: “Nga organisti profan, një himn urrejtjeje.”Në 1939, revista Time e përshkroi zgjedhjen e Hitlerit si “Njeriu i Vitit” duke thënë se “në 1938, Hitleri u shndërrua në kërcënimin më të madh me të cilin bota demokratike, liridashëse përballet sot.”

Për krahasim, artikulli shoqërues për Zelenskin, “Njeriu i Vitit” për vitin 2022, shkruan: “Sepse dëshmoi se guximi mund të jetë po aq ngjitës sa frika, sepse lëvizi popuj dhe kombe për t’u bashkuar në mbrojtje të lirisë, sepse i kujtoi botës se sa e brishtë është demokracia – dhe paqja – Volodymyr Zelensky dhe shpirti i Ukrainës janë Njeriu i Vitit 2022.”

Dukshëm, qasjet ndaj Zelenskyt dhe Hitlerit janë diametrikisht të kundërta.

Në fakt, siç deklaron dhe vetë revista Time, titulli “Njeriu i Vitit” i jepet, që nga viti 1928, “njeriut apo njerëzve që ndikuan më shumë lajmet dhe jetët tona, për mirë apo për keq, dhe mishëruan çfarë ishte e rëndësishme për atë vit, për mirë apo për keq.” Josif Stalin është shpallur dy herë “Njeriu i Vitit”, më 1939 dhe 1942, ndërsa diktatori iranian Ayatollah Khomeini mori titullin për vitin 1979.

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin