Një fotografi që po qarkullon së fundi në rrjet ka ngritur pretendimin se në zyrën e raportuesit europian për dialogun Kosovë – Serbi, Miroslav Lajçak është varur në mur një hartë ku mungon kufiri mes Kosovës dhe Serbisë. Vërtetimi i “Faktoje” tregon se ky informacion është i pavërtetë.
Jona Plumbi
Një imazh i shpërndarë në rrjet ku duket raportuesi i Bashkimit Europian për dialogun Kosovë – Serbi, Miroslav Lajçak në zyrën e tij, me në sfond një hartë ku kufiri mes kosovës dhe Serbisë nuk duket, po përdorur si provë e njëanshmërisë së tij në procesin e ndërmjetësimit të BE-së për normalizimin e marrëdhënieve mes dy vendeve të Ballkanit.
“Ky person, sllovak, që në zyrën e tij mban këtë hartë nuk ka asnjë mundësi të bëjë ndërmjetës mes Serbisë së Madhe dhe diçkaje që nuk ekziston. Ka ardhur koha që shtetet e BE-së t’i vënë gishtin kokës. Ky e mban flamurin e Evropës kot, sepse është pro-rus i betuar.” – shkruhet në një nga shpërndarjet e këtij imazhi në 17 qershor 2023.
Nisur nga ky pretendim “Faktoje” bëri një verifikim për çështjen, e cila ngjalli debat në rrjet.
Imazhi është publikuar për herë të parë në 20 shkurt 2021 nga vetë Miroslav Lajçak, i cili njoftonte një diskutim me drejtuesen e Këshillit të Bashkëpunimit Rajonal të BE-së, Majlinda Bregu, për një bashkëpunim më të madh të rajonit dhe aspiratave europiane të tij.
Fotografia tregon raportuesin europian për dialogun Kosovë – Serbi, me një hartë të rajonit të Ballkanit, ku kufiri mes shtetit të Kosovës dhe atij të Serbisë nuk duket qartë.
E njëjta hartë u shfaq edhe në intervistën që Lajçak dha për European Western Balkans në 20 shkurt të dy viteve më parë.
Kjo pamje, ku Kosova nga larg duket si të jetë pjesë e territorit të Serbisë, nxiti pakënaqësi në rrjet.
Fotografia u shpërnda gjerësisht duke shkaktuar debat lidhur me ekzistencën apo jo të kufirit mes Kosovës dhe Serbisë në hartën që ndodhet në zyrën e Lajçak.
Reagimet qenë të shumta. Ndër to edhe ministrja e Punëve të Jashtme të Kosovës, Meliza Haradinaj shpërndau në Twitter një mesazh ku i sugjerontë Lajçakut të përdorte një hartë të saktë.
Mirëdita @MiroslavLajcak: Maps matter!
— Meliza Haradinaj (@MelizaHaradinaj) February 25, 2021
Realized you need an accurate map of #WB6, so I sent you one by diplo courier. Working w/ zombie maps is utterly unprofessional, hence the deficiencies.
The longer you avert the map I gifted you, the longer your work will be a failure.
Peter Stano, zëdhënësi i BE-së për punët e jashtme e quajti pretendimin e ngritur për hartën “e njëanëshme” si “të pavënd dhe false” në një reagim në rrjetin social Twitter.
“Pretendimi për hartën është i pavënd dhe i pavërtetë. Kjo hartë zyrtare e BE-së është në linjë me pozicionimin e BE-së – status neutral. Do rekomandoja që gjithëkush të fokusohej në çështje të vërteta që ndihmojnë në përparimin e dialogut drejt normalizimit, në vend që të mundohen të krijojnë histori të pavërteta”. – shkruan Stano në Twitter.
Disa orë më vonë erdhi edhe reagimi i vetë raportuesit europian Miroslav Lajçak për çështjen. Përmes një publikimi në rrjetin social Twitter, Miroslav Lajçak publikoi pamjen nga afër të hartës që ndodhet në zyrën e tij.
“Duke qënë se harta në zyrën time, e shfaqur turbullt në fotografinë e intervistës sime, ka ngjallur keqkuptime sot, po ndaj një fotografi nga afër të saj. Është një hartë zyrtare e BE-së për Ballkanin Perëndimor. Kosova është aty, ashtu si edhe linja që ndan Kosovën nga Serbia.” – shkruan Lajçak në Twitter.
Parë nga afër, harta që ka shpërndarë Lajçak duket kështu:
Imazhi tregon vërtetë një linjë mes Kosovës dhe Serbisë, aty ku ndahet kufiri mes dy vendeve. Ajo që bie në sy është fakti se kjo “linjë” nuk është e njëjtë me të tjerat që tregojnë ndarjen e kufijve të shteteve të tjera.
Qëndrimi i BE-së ndaj Kosovës dhe pavarësisë së saj varet edhe nga vendet anëtare. Pesë vende anëtare të BE-së nuk e njohin Kosovën (Greqia, Rumania, Sllovakia, Spanja dhe Qiproja). Për këtë arsye Bashkimi Europian i referohet shtetit të Kosovës vetëm si “Kosovë” me një shënim në fund të faqes ku vendoset teksti i marrëveshjes mes Kosovës dhe Serbisë ku thuhet se: Ky përcaktim është pa paragjykim ndaj qëndrimeve për statusin dhe është në përputhje me Rezolutën 1244/1999 të Kombeve të Bahskuara dhe Opinionin e GJND-së për shpalljen e pavarësisë së Kosovës.
Nisur nga këto informacione mund të kuptojmë se harta e shfaqur në zyrën e Miroslav Lajçak është harta zyrtare që përdor Bashkimi Europian dhe jo një zgjedhje e tij. Gjithashtu kufiri që ndan territorin e Kosovës nga ai i Serbisë, edhe pse jo i njëjtë me kufijtë e tjerë territorial të hartës, është përcaktuar në hartë. Sipas qëndrimeve të BE-së harta në fjalë është në përputhje me pozicionimin neutral të unionit sa i përket njohjes së kufirit mes Kosovës dhe Serbisë.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
