Vendimi i Bashkisë Elbasan për aplikimin e parkimit publik me pagesë kundërshtohet nga përdoruesit e automjeteve, të cilët e konsiderojnë atë si një kosto shtesë që vështirëson edhe më shumë situatën e krijuar nga pandemia “Covid-19”.
Pas Tiranës dhe Korçës, Elbasani është bashkia e tretë në vend që aplikon parkimin publik me pagesë. Me anë të një vendimi të Këshillit Bashkiak u vendos lidhur me rrugët publike që do kalonin me pagesë si dhe tarifat përkatëse në raport me automjetet.
Aplikimi i parkimit publik me pagesë, për qytetarë të ndryshëm të Elbasanit shihet si jo koherent në raport me situatën e krijuar nga panemia “Covid-19”.
Është kosto, që nuk duhej aplikuar, së paku në këto kushte. Njerëzit janë mjaftueshëm të goditur nga kriza e pandemisë dhe kosto e parkimt nuk më duket e logjikshme. Unë makinën e përdor vetëm nëse e kam të pashmangshme për ndonjë nevojë dhe më duhet të parkoj – i tha “Faktojes” Bujar Skënderaj.
![](https://faktoje.al/wp-content/uploads/2020/10/parkim-elbasan-1.jpg)
Parkimi publik me pagesë prek edhe pensionistët, të cilët ankohen se kostoja është “barrë e shtuar” për ta.
Mua më duhet të parkoj 2-3 herë në ditë. Jam pensionist dhe e marr makinën për një hall apo emergjencë që kam. I bie që të shpenzoj gjithë pensionin për të parkuar makinën – i tha “Faktojes” 66 vjeçari Shpëtim Salla.
“Faktoje”, në muajin gusht pyeti në Bashkinë Elbasan lidhur me rrugët e zgjedhura për parkim me pagesë si dhe kostot.
![](https://faktoje.al/wp-content/uploads/2020/10/kerkese-per-informacion-drejtuar-bashkise-elbasan.png)
Nga Bashkia Elbasan na u komunikua se ishin vendosur tetë rrugë në të cilat do aplikohej parkimi me pagesë.
![](https://faktoje.al/wp-content/uploads/2020/10/032.png)
Nga Bashkia Elbasan na u komunikuan gjithashtu edhe tarifat që do aplikohen për parkimet publike me pagesë.
![](https://faktoje.al/wp-content/uploads/2020/10/tarifat-e-parkimit-publik-me-pagese-ne-elbasan.png)
Kryetari i bashkisë Elbasan, Gledian Llatja e konsideroi vendimin për pakimet publike me pagesë si të nevojshëm dhe të mirëstudiuar.
Fillimi i sistemit të për parkimin publik me pagesë në Bashkinë Elbasan ka 4-5 vite që është përcaktuar. Është bërë një studim mbi të gjitha rrugët e përcaktuara, i miratuar edhe nga Këshilli Bashkiak. Në çdo paketë fiskale të miratuar në Bashkinë e Elbasanit është përcaktuar tarifa 50 lekë në orë për parkimin në disa rrugë të qytetit – argumentoi kryetari i Bashkisë Elbasan, Gledian Llatja më 22 qershor, në mbledhjen e Këshillit Bashkiak.
Bashkia Elbasan parashikon që administrimin dhe arkëtimin e parkimeve me pagesë ta bëjë vetë, pa kontraktuar firma private apo institucione të tjera.