Xhafaj: 2017-a, me numrin më të ulët të vrasjeve në 27 vite

2164

INVA HASANALIAJ & ANXHELA RUÇI

Rendi, siguria dhe lufta ndaj grupeve kriminale kanë qenë disa nga premtimet kryesore të Fatmir Xhafaj gjatë marrjes së detyrës si ministër i Brendshëm. Pak muaj pas marrjes së detyrës, në një intervistë televizive ministri Xhafaj ndër të tjera deklaroi: 

“Sipas statistikave, 2017-a ka treguesit më të mirë në rënie të kriminalitetit krahasuar me vitet e fundit. Në 27 vite është numri më i ulët i vrasjeve, i vjedhjeve me dhunë, apo numri i aksidenteve me pasojë vdekjen”.

Nisur nga kjo deklaratë “Faktoje”, vendosi të kontrollojë të dhënat lidhur me numrin e vrasjeve përgjatë kësaj periudhe kohore. Fillimisht komunikuam me Ministrinë e Brendshme për t’u njohur me shifrat zyrtare. Në dispozicionin tonë u vendos grafiku me numrin e vrasjeve të regjistruara që nga viti 1990-2017. Sipas statistikave të këtij institucioni rezultoi se shifrat përputhen me deklaratën e bërë nga ministri Xhafaj.

Abonohu në newsletter

Merr lajmet më të fundit direkt në email.

Ndërkohë në një linjë paralele, komunikuam me 12 drejtoritë vendore të Policisë së Shtetit, për të pasur një informacion më të detajuar, për vrasjet e ndodhura në 27 vite sipas qarqeve. Por secila prej drejtorive e delegoi kërkesën për informacion te Drejtoria e Përgjithshme e Policisë së Shtetit.

Në përgjigjen e kësaj të fundit, thuhet se numri i vrasjeve sipas qarqeve nuk mund të vihet në dispozicion  për vitet  1990-2007 për shkak të mungesës së digjitalizimit. Për këtë arsye të dhënat e vetme që “Faktoje” mori, ishin 11 vitet e fundit (2008-2017).

Statistikat për vrasjet sipas qarqeve korrespondojnë me shifrat e përgjithshme të vëna në dispozicion nga Ministria e Brendshme. Por duke marrë parasysh që mungojnë 16 vite (1990-2007) dhe informacioni nuk është i plotë, deklaratën e ministrit Fatmir Xhafaj do ta klasifikojmë PA KATEGORI.