Wikileaks nuk ka publikuar provën se zbarkimi i njeriut në Hënë ishte inskenim. Video që po qarkullon në rrjet është montazh me skena nga misione të ndryshme hënore dhe skena nga një film i viteve ‘70.

————————————————-

Në rrathët konspiracionistë po qarkullon pretendimi se një video, e cila pretendohet të jetë publikuar nga Wikilieaks, provon se zbritja e njeriut në Hënë ka qenë inskenim.

Për të verifikuar vërtetësinë e këtij pretendimi, si fillim Faktoje kërkoi në faqen e Wikileaks me fjalët kyç “zbritja në Hënë Nevada”, por nuk e gjeti videon e mësipërme.

Kështu, vendosëm të analizojmë videon skenë pas skene.

Duket se klipi është i përbërë nga skena reale nga disa zbritje në Hënë, të ndërthurura nga skena të filmit të 1979, Capricorn One.

Më specifikisht, klipi i mësipërm përmban pamje nga zbarkimi në Hënë në 1969, ku tregohen edhe astronautët Buzz Aldrin dhe Neil Armstrong; nga prapaskenat e xhirimeve të filmit Capricorn One; nga misioni hënor i Apollo 14 në 1971; nga misioni hënor i Apollo 16 në 1972 dhe nga filmi Capricorn One.

Të gjithë klipet e mësipërm janë të disponueshëm për publikun, siç dëshmohet nga montazhi i mësipërm, dhe nuk janë publikuar nga Wikileaks, faqe e cila njihet për publikimin e dokumenteve të klasifikuara.