Gjatë fushatës zgjedhor për zgjedhjet e pjesshme lokale, kryebashkiaku i Rrogozhinës Edison Memolla premtoi ndërtimin e ujësjellësit në Sinaballaj që do të çonte në furnizim 24 orë me ujë të zonës. Verifikimi në terren i “Faktoje” zbuloi se, megjithëse banorët e zonës pohojnë se ujësjellësi është ndërtuar, uji që vjen prej tij është i papërdorshëm, e si rrjedhojë, ata janë të detyruar ta blejnë ujin nga një autobot.

———————————————

Uji 24 orë vijon të mbetet një premtim në Shqipëri edhe në vitin 2022. Por për banorët e njësisë së Sinaballaj në Rrogozhinë uji 24 orë që u premtua nuk është as i pijshëm as i përdorshëm për gatim. 

Në fillim të këtij viti, gjatë fshatës së zgjedhjeve vendore të pjesshme, kryetari i Bashkisë së Rrogozhinës, Edison Memolla, postoi foto nga ecuria e punimeve për ndërtimin e ujësjellësit në njësinë administrative Sinaballaj duke premtuar se kjo zonë do të ketë ujë 24 orë.

Postimi i kryebashkiakut të Rrogozhinës Edison Memolla, më 16 shkurt 2022

Për të verifikuar sa është mbajtur ky premtim, “Faktoje” fillimisht i dërgoi një kërkesë për informacion Bashkisë së Rrogozhinës, më 16 shtator dhe më pas një ankesë tek Komisioneri për të Drejtën e Informimit pasi nuk mori përgjigje brenda afatit ligjor. Më në fund, më 10 tetor, Bashkia e Rrogozhinës ktheu përgjigje. Sipas këtij institucioni, ujësjellësi i njësisë administrative Sinaballaj ka përfunduar, është funksional dhe kjo njësi furnizohet me ujë 24 orë.

Përgjigja e Bashkisë Rrogozhinë kërkesës për informacion nga Faktoje

“Faktoje” udhëtoi drejt Sinaballajt për një verifikim në terren më 5 tetor.

Banorët e zonës konfirmuan se ujësjellësi ishte ndërtuar dhe shtëpitë e tyre furnizoheshin me ujë 24 orë. 

Megjithatë, ata thanë gjithashtu për “Faktoje” se uji që u vinte nga ujësjellësi i Bashkisë ishte i papërdorshëm. Sipas banorëve, uji ishte i turbullt dhe ata nuk e përdorin për t’u larë apo për gatim. 

“Ujë kemi, por nuk e përdorim për të pirë apo për gatim pasi është shumë i turbullt”- shprehet Sh. banore në Sinaballaj.

Shumë familje në Sinaballaj vazhdojnë të përdorin depozita, 5 tetor 2022

Ajo shton se ujin e blejnë çdo ditë, nga një autobot që vjen në zone gjithashtu shumica e shtëpive në zonë janë të pajisura me depozita ku ruhet ky ujë i blerë.

Shumë familje në Sinaballaj vazhdojnë të përdorin depozita, 5 tetor 2022

Shumë familje në Sinaballaj vazhdojnë të përdorin depozita, 5 tetor 2022

Pas verifikimit në terren të “Faktoje”, rezulton se banorët e Sinaballajt paguajnë dy herë për ujin. Pavarësisht se ujësjellësi quhet i përfunduar nga Bashkia dhe paratë publike janë shpenzuar, ai nuk është në funksion të banorëve. Si rrjedhojë, ky premtim i kryebashkiakut të Rrogozhinës Edison Memolla vlerësohet si i pjesërisht mbajtur.