Pretendimi: Suedia po vendos mikroçipa te mijëra njerëz për të zëvendësuar letërnjoftimet, kartat e kreditit, çelësat dhe kuletat.
Verdikti: Mungon konteksti
—————————————————————————-
Në rrjete sociale, përfshi ato shqipfolëse, po qarkullon lajmi se Suedia po vendos mikroçipa te mijëra njerëz për të zëvendësuar letërnjoftimet, kartat e kreditit, çelësat dhe kuletat.
Megjithatë, ky lajm është prezantuar në mënyrë keqinformuese.
Në fakt, një numër kompanish suedeze ofrojnë një çip dixhital që mund të vendoset nën lëkurën e dorës. Mikroçipat e implantuar nuk janë një fenomen i ri në Suedi dhe vendosja e tyre nuk është iniciativë e Suedisë apo qeverisë suedeze, por zgjedhje personale e individëve.
Suedezët kanë filluar të vendosin mikroçipa për një sërë arsyesh dhe kjo praktikë u bë popullore në vitet 2014-2016. Mijëra njerëz po i vendosnin këto mikroçipa për ta bërë jetën e tyre të përditshme më të përshtatshme, duke përdorur skanera dixhitalë për të hyrë në shtëpi, zyra dhe palestra, si dhe për të mbajtur informacione kontakti në rast urgjence, bileta për udhëtime hekurudhore dhe më shumë.
“Festa implantesh” u organizuan gjithashtu që nga viti 2014 nga grupi suedez i biohakimit Bionyfiken si evente ku njerëzit mund të vendosnin vullnetarisht një mikroçip.
Sipas kompanisë së mikroçipimit Chipster, mes viteve 2014 dhe 2020 janë mikroçipuar 6 mijë suedezë. “Mesatarisht 1000 njerëz e kanë marrë çipin në vit që nga viti 2014,” tha bashkëthemeluesi Sina Amoor Pour. “Por gjithashtu duhet të merrni parasysh se kjo ishte shumë më popullore në vitet 2014-2016, pasi ishte diçka e re dhe shumë media raportuan për të. Që atëherë, shkalla e njerëzve që marrin një çip ka rënë.”
Megjithatë, vendosja e mikroçipave nuk është veçori e Suedisë. Në Gjermani mbi 2 mijë persona kanë zgjedhur të vendosin këto implante. Globalisht, vlerësohet se 50-100 mijë persona janë mikroçipuar.
Ndërsa mikroçipat ofrojnë përfitime të komoditetit dhe shpejtësisë, ato gjithashtu mbartin shqetësime për privatësinë dhe sigurinë. Disa teknologë janë të shqetësuar se hakerat që synojnë dobësitë në sensorë dhe arkitekturën e rrjetit mund të përpiqen të hakojnë implantet e çipave. Sipas mikrobiologut Ben Libberton të Institutit Karolinska të Suedisë, implantet e çipave mund të zbulojnë shumë informacione personale, si “të dhëna rreth shëndetit tuaj… të dhëna rreth vendndodhjes suaj, sa shpesh punoni, sa kohë punoni, nëse bëni pushime në tualet dhe gjëra të tilla”. Një tjetër shqetësim i përgjithshëm për sigurinë me teknologjinë e komunikimit në fushë të afërt (NFC) është se ajo mund t’u lejojë palëve të treta të përgjojnë komunikimin e pajisjes ose të korruptojnë të dhënat.
Përveç kësaj, ka shqetësime shëndetësore që lidhen me mikroçipat e implantuar. Sipas një studimi të vitit 2020 nga Shoqata Amerikane për Kirurgjinë e Duarve, implantet me identifikim me radiofrekuencë (RFID) mund të shkaktojnë reaksione negative të indeve dhe të çojnë në papajtueshmëri me disa teknologji të imazherisë me rezonancë magnetike (MRI).
