Entuziazmi i shprehur nga një simpatizant gjatë panairit të Librit, i cili preku në faqe me dashamirësi ish-kryeministrin Berisha, është interpretuar në disa media si goditje me shuplakë ndaj politikanit të djathtë. Pamjet filmike dëshmojnë se titulli i përdorur për një agresion të mundshëm, është i pasaktë.

Jona Plumbi

Figura të njohura publike shpesh herë “përdoren” nga portalet në rrjet për të prodhuar lajme që kanë për synim mbledhjen e klikimeve. Ky është rasti i lajmit të publikuar nga portalet me titull “Sali Berishën e qëllojnë me shpullë në panair, ndërhyjnë me shpejtësi truprojat”.

Imazh i lajmit në reklamavip.com

Kushdo që e ka klikuar këtë lajm, me mendimin se do të informohet mbi incidentin që njofton titulli, pasi lexon artikullin kupton se në fakt situata ka qënë e ndryshme. “Një qytetar në mënyrë dashamirësie, pasi i puthi dorën, e preku ish-kryeministrin me duar në faqe, duke e qëlluar me shpullë në faqe Berishën.” – shkruan artikulli, duke lënë të kuptohet se në fakt “shpulla” ka qenë një shprehje afrimiteti e një simpatizanti dhe jo sulm fizik ndaj ish-kryeministrit, ashtu si nënkupton titulli.

Kjo vërtetohet edhe nga pamjet e momentit të “incidentit” ku duket qartë se simpatizanti i puth dorën Berishës dhe më pas e prek në faqe, si formë përkëdhelie dashamirëse. Ish-kryeministri shfaqet i qeshur gjatë këtij momenti, duke vërtetuar se nuk po ndodh asnjë akt dhune. Duhet thënë se roja personale që shoqëronte zotin Berisha reagoi menjëherë dhe nuk ishte shumë i lumtur nga veprimi fizik i fansit. [fotot më poshtë]

Ky rast, ashtu si shumë raste të tjera, shfrytëzohen nga portalet për të publikuar titujt bombastikë, por që e “shfryjnë” të gjithë “alarmin” e njoftuar në brendësi të tyre. Qëllimi i këtyre artikujve është mbledhja e sa më shumë klikimeve për përfitime personale dhe jo ofrimi I informacioneve të faktuara për lexuesit.

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin