Projekti për transformimin e qendrës së Kuqarit nuk është vënë ende në zbatim, ndonëse u premtua nga kryebashkiakja e Patosit, Rajmonda Balilaj që në vitin 2019. Faktoje ishte në Kuqar më 20 shtator, ku pamë nga afër se fshati ishte harruar nga institucionet, por po braktisej edhe nga banorët.
……..
“Mirëmbajtja e rrugëve të brendshme dhe qendra rurale në zemër të Kuqarit nisin së shpejti”, ky ishte zotimi i bërë nga kryebashkiakja Rajmonda Balilaj, nëpërmjet një postimi në Facebook më 9 qershor të 2019-s.
Postimi në Facebook i Rajmonda Balilajt
Mirëpo, edhe pse kanë kaluar më shumë se 2 vite nga premtimi i bërë nga kryebashkiakja e Patosit, për ndërtimin e qendrës së Kuqarit, puna nuk ka nisur ende. Faktoje ishte në Kuqar në 20 shtator për të verifkuar në terren zotimin e bërë.
Ne konstatuam që qendra e tij ishte shndërruar në një vendgrumbullimi mbetjesh dhe dukej qartë, që ky fshat ishte lënë në harresë.
Qendra e Kuqarit, shtator 2021
Një shkollë e vjetër dhe e rrënuar, një ambulancë që ofronte shërbim deri në orën 14:00 dhe grumbuj mbetjesh, ishin ato që Kuqari mund t’i ofrojë sot banorëve të tij. Në asnjë cep të tij nuk shiheshin makineri apo tabela, që lajmëronin se do të ngrihej një kantier ndërtimi.
Ambulanca në Kuqar, shtator 2021
Faktoje bisedoi edhe me banorë të zonës, të cilët nuk ishin ne dijeni të një projekti të tillë.
“Nuk kemi dëgjuar gjë që do rregullohet qendra. Njerëzit po ikin nga këtu, ka marrë fund. Jemi ngopur me premtime, por deri më tani, asgjë konkrete”, thanë banorët.
Shkolla e Kuqarit, shtator 2021
Gjithashtu banorët tregojn se dita – ditës fshati po braktiset. Tregues i këtij fenomeni shqetësues është edhe mbyllja e kopshtit vetëm pak ditë më parë.
“Këtu kanë mbetur vetëm të moshuar. Ne na mbajnë emigrantët. Para pak ditësh u mbyll edhe kopsht, nuk kishte fëmijë, 3-4 fëmijë ishin. Shkolla ka vite që është mbyllur. Nuk ka të ardhme këtu”, tregoi një banore e Kuqarit për Faktoje.
Ne iu drejtuam me një kërkesë për informacion edhe Bashkisë Patos, ku morëm këtë përgjigje: “Ndërtimi i qendrës së Kuqarit, Patos është objekt në fazën e planifikimit, por mbetet në vëmendje të Bashkisë për një implementim sa më të hershëm të saj”.
Përgjigja e Bashkisë Patos për Faktoje
Premtimi për ndërtimin e qendrës së Kuqarit është ngritur si çështje nga Faktoje edhe një vit më parë, më 28 nëntor të 2020-s. Në artikull, theksohej se ky projekt nuk ishte buxhetuar dhe ende sot nuk ka hapa konkretë për realizimin e tij.
Nga verifikimi që ne bëmë në terren, informacionet e grumbulluara dhe komunikimi me banorët, rezulton se ky premtim i bërë që në 2019 është I PAMBAJTUR.
