E përzgjedhur nga socialistët për të kandiduar për një tjetër mandat në krye të Bashkisë së Durrësit, kryebashkiakja Emiriana Sako po vijon fushatën elektorale edhe në rrjetet sociale. Në postimet e kryebashkiakes propagndohen edhe investimet e mëhershme publike, siç është rasti i shkollës 9 vjeçare “Bedrie Bebeziqi“, e rindërtuar në vitin 2021 me fonde të qeverisë. Mirëpo, Faktoje ka verifikuar se kjo shkollë nuk i ofroi të gjitha kushtet dhe standadet bashkëkohore, siç deklaron kryetarja e Bashkisë së Durrësit, Emiriana Sako.
Kryebashkiakja e Durrësit, Emiriana Sako, e zgjedhur nga socialistët për të kandiduar për një tjetër mandat, po bën fushatë edhe në rrjetet sociale ku hera-herës propagandon rindërtimin e veprave publike. Në datën 18 prill ajo bëri këtë postim në profilin e saj në Facebook.
“Mirëmëngjes me shkollën ‘Bedrie Bebeziqi’, një tjetër shkollë me kushte e standarte bashkëkohore”.
Screenshot, postimi i Sakos në Facebook, 18 prill 2023
Zonja Sako ka publikuar foto se si është transformuar shkolla 9 vjeçare “Bedrie Bebeziqi”, duke propaganduar një investim të qeverisë në prag të zgjedhjeve të 14 majit. Nga verifikimi rezulton se shkolla “Bedrie Bebeziqi”, pjesë e procesit të rindërtimit pas tërmetit të nëntorit 2019, është hapur që në vitin 2021.
Shkolla është financuar nga Fondi i Rindërtimit ne Buxhetin e Shtetit miratuar me Vendimin Nr. 212, datë 11.03.2020: “Për përdorimin e fondit të rindërtimit për financimin e rindërtimit të objekteve arsimore” dhe është një investim me vlerë rreth 104.7 milionë lekë.
Por përtej propagandës me investimet publike, për fushatën e zgjedhjeve vendore, verifikuam edhe një të pavërtetë në deklaratën e Sakos. Në shkurt 2023, një artikull i publikuar në Faktoje tregoi me pamje se klasa në katin e sipërm të shkollës “Bedrie Bebeziqi“ ishin të mbuhura me ujin e shiut që kishte depërtuar, edhe pse shkolla kishte më pak se një vit që ishte përuruar, duke e bërë të pamundur zhvillimin e procesit mësimor, fakt të cilin e konfimonte në muajin janar edhe vetë bashkia Durrës në përgjigjen zyrtare për Faktoje.
Përveç kësaj, në muajt e dimrit, sistemi i kaldajave nuk funksiononte, kjo sipas dëshmive të nxënsve dhe fotove që siguroi Faktoje ku ngrohja bëhej me furnela elektrike, ndërkohë që zyrtarisht bashkia e mohonte një gjë të tillë.
Nga ky verifikim i thjeshtë deklarata e zonjës Sako ka një të pavërtetë, pasi disa nga standarded e shkollës në fjalë janë shkelur, ndryshe nga çfarë propagandohet.
Ky shkrim u publikua në kuadër të projektit “Nxitja e llogaridhënies së zyrtarëve të lartë” mbështetur nga National Endowment Democracy (NED) dhe zbatuar nga Faktoje.
