Pretendimi: Video e princeshës Kate Middleton ku pranoi se është e sëmurë është e manipuluar me inteligjencën artificiale
Verdikti: E pavërtetë
Video e princeshës Kate Middleton nuk është e manipuluar, siç pretendohet në postime të shpërndara në rrjetet sociale në vendin tonë. Verifikimet e kryera dhe konfirmimi nga BBC tregojnë se video është autentike.
———————
Postime të shpërndara në rrjetet sociale në vendin tonë pretendojnë se video e Princeshës së Uellsit, Kate Middleton, ku ajo deklaron se po trajtohet për kancer, është e manipuluar.
“Kate AI Middleton robot e veshur me të njëjtat rroba në videon e djeshme me ato që kishte veshur para 7 vitesh. … asnjë lule përreth saj nuk lëviz nga era që fryn, sepse ikona që shohim pas Kate është thjesht një pikturë”-shkruajnë përdorues në rrjetet sociale.
Postimet e shpërndara në rrjetet sociale
Më 22 mars 2024, Princesha Catherine e Uellsit publikoi përmes BBC-së një video deklaratë se ajo njoftonte se po trajtohej për kancer.
Por kaq mjaftoi që të shfaqeshin pretendime në rrjetet sociale se video është e manipuluar, duke treguar si “provë” bluzën, që thuhet se Kate e ka veshur edhe në vitin 2016 në një promo për një fushatë të shëndetit mendor.
Me sa duket, për t’i dhënë fund spekulimeve mbi vërtetësinë e video-deklaratës të Kate, “BBC Studios” lëshoi një deklaratë në të njëjtën ditë me videon, duke theksuar: “BBC Studios filmoi një mesazh nga Princesha e Uellsit në Windsor këtë javë. Ne dëshirojmë t’i urojmë Lartmadhërisë së saj shërim të shpejtë”.
Kolegët e “Logically Facts” kanë bërë një analizim të pamjeve, ku konfirmuan se nuk ka asnjë shenjë manipulimi të saj, përveç editimeve normale të prodhimit të videove.
“Është një video e krijuar në mënyrë profesionale dhe është bërë një përpunim i zakonshëm (si në audio ashtu edhe në pamje). Analiza jonë e videos tregon se është origjinale dhe ne nuk gjetëm asnjë shenjë manipulimi”, tha Mayank Vatsa nga Itisaar për “Logically Facts”.
Si provë se video nuk është autentike, postimet në internet tregojnë bluzën e Kate, duke pretenduar se ajo kishte veshur të njëjtën bluzë në një promovim të vitit 2016 për fushatën “Heads Together”.
Mirëpo, një krahasim i videos promocionale me atë të videos së deklaratës së fundit të Kate tregon se nuk është e njëjta bluzë. Zbukurimet në trup dhe mëngët e bluzës së veshur nga Kate në videon e fundit janë dukshëm më të gjera dhe vijat e zeza nëpër bluzë janë dukshëm më të holla se ato që shihen në bluzën në promo. Bluza në videon e fundit gjithashtu duket se ka një formë më të lirshme.
Teoritë konspirative rreth shëndetit dhe vendndodhjes së Princeshës Kate filluan të qarkullojnë pasi ajo ishte jashtë syrit të publikut, pas një operacioni abdominal që iu nënshtrua më 16 janar.
Pretendimet në internet u intensifikuan, kur një foto e publikuar nga “Kensington Palace” më 10 mars 2024, që tregonte Kate dhe fëmijët e saj, u tërhoq nga disa agjenci të lajmeve për shkak se fotografia ishte manipuluar.
