Pretendimi: NASA ka publikuar një foto të astronautëve që kultivojnë fruta në Mars
Verdikti: I pavërtetë / Foto AI
Në postime të shpërndara në rrjetet sociale është publikuar një foto, ku shfaqen një grup astronautësh, duke mbjellë pemë në hapësirë. Sipas pretendimeve, ata janë në Mars, duke theksuar se po ndërtojnë atje, atë që po shkatërrojnë në tokë.
“Një ndër fotot e publikuar nga NASA duke pretenduar për arritjet në Mars. Ata ditë e natë bëjnë shkatërrime në tokë, pasi ajo është e rregulluar dhe të pacipët dalin e thonë po ndërtojmë në Mars”-shkruajnë përdorues në rrjetet sociale.
Postimet e shpërndara në rrjetet sociale
Do të ishte bukur që një pamje e tillë të ishte e vërtetë dhe njerëzimi të kishte nisur kultivimin e prodhimeve bujqësore në terrenin e vrazhdë për jetën në planetin Mars.
Nëse do të shohim me vëmendje imazhin, vihet re se në fund të saj tregohet që është një foto e krijuar nga Inteligjenca Artificiale. Me anë të mjeteve të kërkimit, ne zbuluam edhe shumë foto të tjera të krijuara me AI, ku shfaqen astronautët në hapësirë duke mbjellë pemë. Në këto imazhe tregohet qartë që ato janë të krijuara nga programet e Inteligjencës Artificiale.
Në bëmë dhe një verifikim të fotos nëpërmjet programit AI or not, ku rezultoi se imazhi është i gjeneruar nga programe të Inteligjencës Artificiale.
Gjithashtu shihen detaje në foto, ku mjetet e punës janë të shkëputura nga duart e astronautëve, apo edhe koka e njërit prej tyre që duket si jo proporcionale me trupin.
“Faktoje” ka verifikuar dhe më parë imazhe të gjeneruar me AI që janë marrë për të vërteta në rrjete sociale.
