Pretendimi: Mjekja shqiptare këshillon preparatin që trajton papilomat duke luftuar parazitët në trupin e njeriut
Verdikti: E pavërtetë
Në faqet online qarkullojnë artikuj, ku ofrohet një medikament që pretendohet se ofron zgjidhje kundër parazitëve në trupin e njeriut.
“Papilomat shkaktohen nga parazitët në trup! Në qoftëse keni papiloma në qafë ose në vende të tjera – parazitet po ju hanë nga brenda!” – shkruan faqja që mban emrin “Jetë e Shëndetshme”.
Screenshot nga portali “Jetë e Shëndetshme”
Artikulli është shkruar në formën e një interviste me mjeken Dr.Besa Krasniqi, ku thuhet se ajo ka një përvojë prej 25 vitesh në fushën e mjekësisë, duke shtuar: “Profesor i Asociuar në Institutin e Kërkimeve Shkencore të Mjekësisë Tropikale. Më shumë se 30 punime mbi biologjinë molekulare”.
Mirëpo, nga kërkimi në faqen zyrtarë të Ministrisë së Shëndetësisë rezulton se ne nuk kemi një Institut të Kërkimeve Shkencore të Mjekësisë Tropikale, siç pretendohet në këtë shkrim.
Për më tepër, nga një kërkim i thjesht në listën e mjekëve shqiptarë nuk rezulton të ketë një profesioniste shëndeti me emrin Besa Krasniqi në Shqipëri. Ndërkohë, në Kosovë është një mjeke me këtë emër, Besa Ramadani Krasniqi, por është mjeke oftalmologe.
Nga një kërkim në Tineye rezulton se imazhi i përdorur për mjeken është foto ilustruese e marrë në internet dhe që qarkullon së paku që prej vitit 2022.
Përsa i përket pretendimit se papilomat janë rezultat i pranisë së parazitëve në trup studimet shkencore provojnë se papilomat apo ndryshe lythat janë pasojë e infeksioneve të viruseve të familjes human papilloma HPV. Ky virus stimulon rritjen e shpejtë të qelizave që gjenden në pjesën e jashtme të lëkurës. Pirja e duhanit dhe dëmtimi i lëkurës nga dielli janë gjithashtu arësye të tjera për shfaqjen e papilomave.
Faktoje ka raportuar edhe më herët mbi këto skema mashtrimi, ku përdoren mjekë “fantazmë” për të shitur produktet.
