Nga Erjola Azizolli
Një auditim i Kontrollit të Lartë të Shtetit për Spitalin Rajonal të Durrësit (2015–2018), i publikuar në vitin 2019, (i fundit deri më tani referuar mbetjeve) evidentoi shkelje serioze në menaxhimin e mbetjeve spitalore në atë spital
Raporti thekson se mbetjet e rrezikshme nuk janë trajtuar sipas klasifikimit përkatës por si të zakonshme, në kundërshtim me ligjin, ndërsa në një tjetër konstatim nënvizohet se “dokumentacioni i administruar nuk siguron prova të plota mbi kryerjen e shërbimit”.
Referuar raportit, u konstatuan shpenzime të paargumentuara (për shkak të mungesës së dokumentacionit justifikues) ndërsa nënvizohet se “grupi i auditimit nuk mund të shprehet mbi saktësinë, plotësinë dhe vërtetësinë e kryerjes së shërbimit” .
Po ashtu, sipas raportit, nuk janë ndjekur procedurat e nevojshme për të siguruar që mbetjet të jenë asgjesuar realisht.
Mbetjet spitalore sot
Por si është sot situata e mbetjeve në Durrës dhe sa janë reflektuar rekomandimet e KLSH?
Referuar përgjigjeve për Faktoje, në Spitalin Rajonal të Durrësit, ka një kontratë me një kompani të licencuar për asgjesimin e mbetjeve spitalore, por transparenca mbetet e kufizuar
Zyrtarisht, spitali deklaron për Faktoje se shërbimi me kompaninë e liçensimit kryhet sipas ligjit.
Për këtë proces, nga viti 2022 deri në 2025 janë paguar mbi 32 milionë lekë.
Por kur kërkohet të shihet kontrata, institucioni refuzon, duke e justifikuar me “sekret tregtar” dhe për pasojë ”nuk mund të bëhet publike” .
Në të njëjtën kohë, mbi mënyrën e matjes së mbetjeve, spitali deklaron se “sasia e mbetjeve matet me peshë reale përmes peshoreve elektronike në përdorim”.
Megjithatë, dokumentet tregojnë se peshorja për matjen e mbetjeve është vendosur në përdorim vetëm në vitin 2025, ndërkohë që raportohen të dhëna edhe për vitet më parë
Të dhënat e vëna në dispozicion nga Spitali Rajonal Durrës:
2022 – 24784.5 kg
2023 – 24445.7 kg
2024 – 33019.3 kg
2025 – 35059 kg
AKM
Për më tepër, Agjencia Kombëtare e Mjedisit konfirmon se spitali nuk është inspektuar prej pesë vitesh
Sipas autoritetit përgjegjës për monitorimin mjedisor, “Spitali Durrës nuk është inspektuar, por do të jetë pjesë e subjekteve të planifikuara nga ana e institucionit tonë për kontroll të kritereve dhe zbatimit të kushteve të lejes mjedisore”.
Por AKM thotë gjithashtu se Spitali Rajonal Durrës kryen transportin e mbetjeve sipas kontratave me subjekte tË liçensuara
“Subjektet që janë të pajisur me leje mjedisi janë objekt kontrolli nga kjo agjenci”, thotë AKM
Mekanizmi i monitorimit
Auditimet e mëparshme të Kontrollit të Lartë të Shtetit tregojnë se problematikat në Spitalin Rajonal të Durrësit nuk kufizohen në një proces të vetëm apo në një periudhë të caktuar.
Nga menaxhimi i mbetjeve spitalore, ku mungesa e dokumentimit dhe verifikimit e bën të vështirë vlerësimin e plotë të shërbimit, te funksionimi në situatë emergjence gjatë pandemisë, ku janë evidentuar dobësi në shërbime jetike, burime njerëzore dhe menaxhim financiar, vihet re një element i përbashkët: mungesa e mekanizmave efektivë të kontrollit dhe monitorimit.
Në këtë kontekst, gjetjet e auditimeve sugjerojnë se sfidat nuk lidhen vetëm me raste të veçanta, por me mënyrën se si funksionojnë dhe mbikëqyren proceset në tërësi, duke ngritur pikëpyetje mbi efektivitetin e masave për adresimin e tyre në praktikë.
Në mungesë të transparencës dhe dyshimeve për sistemet e mbikqyrjes së procesit, menaxhimi i mbetjeve në spitalin rajonal të Durrësit nuk ofron garancitë e duhura të funksionimit.
Ky shkrim publikohet në kuadër të konkursit vjetor “Fatos Baxhaku”, pjesë e nismës Truth Beyond Numbers, e zbatuar nga Faktoje përmes mbështetjes së programit MATRA të Ambasadës së Mbretërisë së Vendeve të Ulëta. Pikëpamjet e shprehura në shkrime i përkasin autorëve dhe nuk reflektojnë domosdoshmërisht pikëpamjet e Mbretërisë së Vendeve të Ulëta
