Pretendimi: Kryeministri sllovak u sulmua për shkak të qëndrimeve pro-ruse
Verdikti: E pavërtetë
Barbara Halla
Me 15 maj, kryeministri i Sllovakisë, Robert Fico, u qëllua pesë herë me armë pas një takimi qeveritar në Handlová, një qytet në qendër të vendit. Policia e identifikoi dhe ndaloi menjëherë sulmuesin, 71-vjeçarin Juraj Cintula.
Pas sulmit, në portalet shqiptare qarkulluan pretendime të shumta sipas të cilave Fico u qëllua për shkak të bindjeve të tija euroskeptike dhe pro-ruse. Këto pretendime të publikuara në rrjetet sociale janë të pabaza dhe të paverifikuara.
![](https://faktoje.al/wp-content/uploads/2024/05/image-56.png)
Fico nisi një mandat të tretë si kryeministër pas zgjedhjeve parlamentare të 2023 (ai kishtë shërbyer në këtë rol edhe dy herë te tjera, në 2006-2010 dhe 2012-2018). Është e vërtetë që Fico, i cili përshkruhet si ultranacionalist i majtë, ndërrmori një fushatë elektorale me një platformë anti-amerikane dhe pro-ruse, duke premtuar se do të ndalonte ndihmën ushtarake për Ukrainën. Për më tepër, ai ka ndarë dhe propagandë ruse, duke fajësuar NATO-n për pushtimin e Ukrainës.
Në të shkuarën Fico dhe qeveria e tij kanë qenë shënjestra e disa protestave për shkak të politikave populiste, të cilat përfshijnë përpjekje për censuruar median vendase. Megjithatë, për momentin nuk ka asnjë provë konkrete se sulmi ndaj tij vjen si pasojë e politikave pro-ruse të Ficos, ndërsa policia sllovake po vazhdon hetimet.
Cintula, një ish-roje sigurie, i cili e përshkruan veten si shkrimtar, i ka thënë policisë vendase që sulmin e kishte paramenduar disa ditë para vizitës së Ficos në Handlová, por nuk kishte dashur ta vriste atë. Ditën e sulmit, ai kishte qënë pjesë e një grupi të vogël qytetarësh që po prisnin jashtë godinës ku u mbajt takimi qeveritar, për të folur me Ficon.
Në fakt, gazetari slovak Szabolcs Panyi zbuloi në Facebook postime të bëra nga Cintula të cilat tregojnë se ai e mbështet Rusinë dhe Kremlinin, dhe është pjesë e një grupi paraushtarak të quajtur Slovenskí Branci, i cili ka lidhje me Kremlinin. Slovenskí Branci akuzohet se është përpjekur të rekrutojë të rinj në të gjithë Sllovakinë për organizatën e tij paraushtarake. Në një postim nga janari 2016, Cintula shihet duke mbajtur një fjalim pranë anëtarëve të grupit të veshur me kamuflazh. Kjo e kaluar e tij pranë grupimit pro-rus rrëzon dyshimet për një hakmarrje ndaj Ficos për shkak të qëndrimeve të tij pro-ruse.
![](https://faktoje.al/wp-content/uploads/2024/05/image-57.png)
Presidentja sllovake Zuzana Čaputová tha policia do të japin më shumë informacion kur të kenë mundësi dhe i kërkoi publikut të mos përhapë thashetheme të pakonfirmuara. Ndërkohë, Ministri i Mbrojtjes Robert Kaliňák e përshkroi sulmin si të motivuar nga arsyje politike. Ndërsa Ministri i Brendshëm Matúš Šutaj deklaroi se ky atentat vjen si pasojë e një klime urrejtje.
“Dua t’i bëj thirrje publikut, gazetarëve dhe të gjithë politikanëve që të ndalojnë përhapjen e urrejtjes,” tha Eštok. Ai bëri dhe një thirrje të përgjithshme për të “ndaluar sulmet dhe urrejtjen në rrjetet sociale dhe mediat”, qoftë për opozitën apo për qeverinë.