MERXHAN DACI dhe INVA HASANALIAJ
Pas palmave, në autostradën Tiranë-Durrës në fundin e vitit të shkuar u vendos që të mbillen pisha të buta. Këshillli Bashkiak i Tiranës miratoi zëvendësimin e bimësisë dekorative përgjatë arteries kyçe të hyrjes në kryeqytet gjatë mbledhjes së Këshillit bashkiak të Tiranës në datën 23 nëntor.
Kostoja e plotë e projektit “Furnizim dhe vendosje drurë dekorativë në zonën industriale Kamëz-Kashar” është 333,8 milionë lekë ose 2,5 milionë Euro.
Kreshnik Çollaku, kreu i demokratëve në Këshillin Bashkiak në deklaratën për mediat tha se pishat do të hiqen përsëri pas projektit që ekziston për zgjerimin e autostradës.
“Harxhohen 2.5 milionë euro nga taksat e qytetarëve të Tiranës për të shkulur palma e për të ngulur pisha të cilat për një vit apo dy do të hiqen prapë. Pra është një abuzim i turpshëm”, tha ai.
*Aksi ku janë mbjellë pishat
Ndërkohë inxhinierja e Autoritetit Rrugor Shqiptar, Albana Ahmeti tha për FAKTOJE se projekti i zgjerimit të autostradës nuk parashikon fare bimësi apo pemë.
“Projekti nuk parashikon pemë. Por mund të marrë disa vite që të vihet në zbatim. Bashkia e Tiranës është lajmëruar për zgjerimin por ka projekt tjetër ndërsa ne kemi tjetër por zbatimi mund të marrë shumë kohë derisa edhe të financohet.”
Bazuar nga gjitha të dhënat e mbledhura, duke nisur nga deklarata fillestare deri tek konfirmimi i ekspertes, FAKTOJE e konsideron këtë deklaratë GJYSMË TË VËRTETË pasi Çollaku u shpreh se në një ose dy vite ato do të hiqen prapë, megjithatë ekspertja e ARRSH nuk dha datë për fillimin e projektit.
