Një gjeneral i lartë izraelit nuk është rrëmbyer nga Hamasi, siç pretendohet në disa artikuj që qarkullojnë në mediat në vendin tonë. Sipas informacioneve, Aloni është shfaqur në takime me zyrtarëve të lartë ushtarakë izraelitë, duke diskutuar për konfliktin.
Raportime në rrjetet sociale dhe në portale në Shqipëri pretendojnë se gjenerali i rëndësishëm izraelit është rrëmbyer nga Hamasi.
“Rroftë Irani! Hamasi ka kapur peng gjeneral Nimrod Alonin!”–shkruajnë përdorues në rrjetet sociale.
“Sulmi i koduar ‘al-aksa’ kundër Izraelit rrëmbehet nga banesa një komandant izraelit”-raportojnë portalet.
Postimet e shpërndara në rrjetet sociale
Ne vendosëm të bëjmë një verifikim të këtyre lajmeve që po qarkullojnë në vendin tonë, duke iu referuar burimeve të besueshme të informacionit. Referuar të dhënave nga ‘Assosciated Press”, Aloni, një gjeneral i lartë, nuk është në duart e Hamasit. Sipas AP, kjo është konfirmuar nga Daniel Hagari, zëdhënësi kryesor ushtarak i IDF (Forcat e Mbrojtjes së Izraelit.) Hagari deklaroi për gazetarët të shtunën se pretendimet se Aloni u kap nuk janë të vërteta.
Aloni shfaqet qartë në një video 10 sekondëshe, gjatë një takimi të mbajtur të dielën nga zyrtarët e lartë të IDF, ku u diskutuan zhvillimet e konfliktit Izrael-Hamas. IDF gjithashtu publikoi pamje nga takimi në rrjetin X, ku duket gjenerali Aloni në skajin e majtë. Ushtria izraelite konfirmoi për AP se Aloni është njeriu që shfaqet në video dhe në fotot e publikuara në rrjetin X.
Ushtria izraelite ka konfirmuar se militantët e Hamasit po mbajnë peng civilë dhe ushtarë izraelitë në Gaza. Ata kanë paralajmëruar se do të vrasin një peng sa herë që ushtria izraelite bombardon objektivat civile në Rripin e Gazës pa paralajmërim. Një zëdhënës i ushtrisë izraelite tha të dielën në mëngjes se dy situata pengjesh ishin “zgjidhur”, por nuk sqaroi nëse të gjithë pengjet ishin shpëtuar të gjallë.
Gati 1,600 njerëz nga të dyja palët janë vrarë në luftën e fundit Izrael-Hamas, ndërsa me mijëra persona kanë mbetur të plagosur.
Konflikti Izrael-Palestinë ka shërbyer si burim dizinformimi dhe Faktoje ka verifikuar një sërë artikujsh të rremë.
