Pavarësisht pretendimit të këtij profesori të panjohur në 1965, Hëna nuk është e përbërë nga plazma kozmike. Teoria e propozuar, jo vetëm që nuk shoqërohet me prova, por ra poshtë në 1969 kur astronautët e Apollo 11 zbritën në Hënë.
——————————————————–
Në rrjetet konspiracioniste që ndajnë dyshimin se NASA nuk ka zbritur kurrë në Hënë, po qarkullon një video bardhë e zi e një burri që pretendon se Hëna nuk është gur, por është përbërë nga “plazma kozmike”. Postimi që shoqëron videon e daton atë në vitin 1965 dhe e quan burrin “shkencëtari Prof. R. Foster”, i cili pretendohet se është zhdukur së bashku me studimet e tij.
Nëse Hëna është plazëm, pretendon burri në video, atëherë zbarkimi në Hënë është i pamundur dhe njeriu nuk do të mundë kurrë të shkelë në Hënë. Për më tepër, të gjitha ligjet e natyrës, përfshi edhe atë të gravitetit, do duhet të rishqyrtohen.
Video duket se është shkëputur nga një intervistë më e gjatë e televizionit australian ABC Australia, logo e të cilët shfaqet në cepin e sipërm, majtas.
Në përshkrimin e videos së ngarkuar në kanalin e ABC Australia deklarohet se “ABC nuk ka mundur të konfirmojë identitetin e Z. Foster përtej një shënimi në fletorën e produksionit nga 1965: ‘Njerëz – Profesori Tazmanian (FOSTER)’“ Më tej, ABC “nuk ka mundur te gjejë ndonjë dokumentim të punës së tij.”
Duket se teoria e Prof. Foster nuk ka arritur të lerë gjurmë në histori. Duke qenë se ai nuk e shtjellon, shpjegon apo ofron prova për ta mbështetur atë gjatë intervistës me ABC, teoria e Hënës prej plazme mbetet e paprovuar.
Në një pjesë të videos, intervistuesi i thotë Foster se amerikanët dhe rusët po mendojnë të dërgojnë njerëz në Hënë. Kësaj, Foster i përgjigjet: “Oh, epo kjo nuk do të ndodhë kurrë. Jo në Hënë. Në Mars, në Venus dhe planete të tjerë, po. Por Hëna eshtë padyshim, siç pohova, një plazmë.”
Teoria e Hënës prej plazme ra poshtë 4 vite pas intervistës së Foster, kur në 20 korrik 1969, anija kozmike Apollo 11 zbriti në Hënë dhe astronauti amerikan Neil Armstrong u bë njeriu i parë që shkeli në Hënë.
Astronauti Buzz Aldrin në sipërfaqen e Hënës, 20 korrik 1969
Siç mund të shihet nga gjurmët në foton e mësipërme, sipërfaqja e Hënës nuk është plazmë, por e ngurtë.
Gjurma e këmbës së Aldrin; pjesë e një eksperimenti për të shqyrtuar vetitë e dheut hënor
Astronautët e Apollo 11, Buzz Aldrin dhe Neil Armstrong, sollën kampionët e parë gjeologjikë nga Hëna në Tokë. Ata mblodhën 21.6 kg material, përfshi 50 gurë, kampionë nga dheu i sipërfaqes hënore, dhe dy tuba me material nga deri në 13 cm nën sipërfaqen e Hënës. Këta kampionë nuk pëmrbanin ujë. Ata përmbanin 2 lloj gurësh, bazalt dhe breccia.
Bazalt (majtas) dhe breccia (djathtas) të marrë nga sipërfaqja e Hënës gjatë misionit Apollo 11
