Imazhi i përdorur nga portalet për të ilustruar sekretaren e përgjithshme të Ministrisë së Shëndetësisë, Joana Duron, në fakt i përket një studenteje nga Portugalia, Faktoje verifikoi foton në fjalë, e cila duket se ka krijuar konfuzion edhe te lexuesit online.
Në një artikull që mban datën 2 qershor, portalet kanë publikuar një artikull mbi arrestimin e sekretares së përgjithshme të Ministrisë së Shëndetësisë, Joana Duro. Krahas artikullit mediat online kanë publikuar edhe foton ilustruese, ku pretendojnë se personi në imazhin përkatës është sekretarja e përgjithshme.
“Del FOTO/ Kush është Joana Duro që u arrestua me urdhër të SPAK, u gjobit edhe nga KQZ se bëri postime elektorale në faqen e Ministrisë së Shëndetësisë”, shkruan Alfapress.
Faktoje bëri një verifikim të fotos së publikuar, ku rezulton se në fakt personi në foto nuk i përket sekretares së përgjithshme të ministrisë, por një vajze të quajtur Joana Duro nga Portugalia.
Në një kërkim të bërë në Facebook e saj, shihet që ajo është me origjinë nga Vila Real, por jeton në Kopenhagen. E reja është studente te Qendra e Fondacionit ‘Novo Nordisk’ për Kërkimin e Proteinave.
I njëjti profil është edhe në Linkedin, ku e reja me origjinë nga Portugalia dhe që studion në Danimarkë ka si foto profili, imazhin e përdorur nga portalet, duke e etiketuar si sekretarja e Përgjithshme e Ministrisë së Shëndetësisë.
Screenshot, profili I Joana Duro, studente në Kopenhagen
Ndërkohë, po të shohim artikuj të tjerë në lidhje me skandalin e sekretares Joana Duro, të publikuar nga media të tjera online, shihet një grua tjetër, më e madhe në moshë se vajza nga Portugalia.
Përdorimi i imazhit të Joana Duros në mënyrë të gabuar është denoncuar edhe nga kolegë gazetarë në rrjetet e tyre sociale.
