Zbarkimi i njerëzve në Hënë ka qenë shënjestër e teorive konspirative që në mesin e viteve 1970. Një fotografi e astronautit Don Pettit në një shesh xhirimi po përdoret si ‘provë’ se udhëtimi në hapësirë është inskenim. Verifikimi i “Faktoje” zbuloi se fotografia është bërë në xhirimet e një reklame ku shfaqet edhe astronauti Pettit.
—————————————-
Një foto që tregon një burrë të veshur me uniformën e NASA (Administrata Kombëtare e Aeronautikës dhe Hapësirës së ShBA) në një shesh xhirimi po përdoret nga konspiracionistët si dëshmi se udhëtimi hapësinor është një mashtrim i inskenuar.
![](https://faktoje.al/wp-content/uploads/2023/05/image-89.png)
Me anë të një kërkimi me motorin e kërkimit të imazheve Google Reverse Image Search, “Faktoje” zbuloi se fotografia e mësipërme është autentike, por nuk ka të bëjë me inskenimin e ndonjë udhëtimi hapësinor.
![](https://faktoje.al/wp-content/uploads/2023/05/image-90.png)
Foto e prapaskenave gjatë xhirimit të një klipi për fushatën #WhyIMake
Ajo është shkrepur gjatë xhirimeve të një klipi të 2017 që ishte pjesë e fushatës #WhyIMake, një fushatë që ka për qëllim ekspozimin e krijuesve dhe shpikësve.
![](https://faktoje.al/wp-content/uploads/2023/05/image-91.png)
Astronauti Don Pettit ka qenë tre herë në Stacionin Ndërkombëtar Hapësinor dhe ka jetuar atje për më shumë se një vit.
Ai shfaqet në këtë klip si krijuesi i Filxhanit Zero Gravitet (Zero Gravity Cup), një filxhan nga i cili mund të pish edhe në kushtet e mungesës së gravitetit në hapësirë. Ideja dhe nevoja për këtë shpikje erdhi, sigurisht, nga përvojat e tij në zero gravitet.
Filxhani Zero Gravitet është objekti i parë i patentuar që është shpikur në hapësirën jashtëtokësore.