Gjatë fushatës elektorale për zgjedhjet e 14 Majit, kandidati socialist për Bashkinë Vlorë, Ermal Dredha përfshiu në programin e tij edhe ndërtimin e terminalit të autobusëve ndërqytetas. Por informacioni që Bashkia Vlorë i dha Faktojes tregon se, në rastin më të mirë, terminali ka mbetur vetëm një projekt-ide, pasi mungon financimi për ta realizuar.
Jona Plumbi
Në 10 Maj gjatë fushatës elektorale për zgjedhjet vendore, kandidati socialist për Bashkinë e Vlorës, Ermal Dredha premtoi ndërtimin e terminalit të autobusëve ndërqytetas, për të mundësuar akses për të gjithë vizitorët nga brenda dhe jashtë vendit. Ky premtim lidhej me prioritetin e katërt të programit elektoral të Dredhës, turizmin.
![](https://faktoje.al/wp-content/uploads/2023/12/image-80.png)
Ne u interesuam pranë Bashkisë Vlorë për planin e saj në përmbushje të këtij premtimi, pas fitores së socialistit Ermal Dredha në zgjedhjet e 14 Majit me mbi 28 mijë vota.
![](https://faktoje.al/wp-content/uploads/2023/12/image-81.png)
Në përgjigjen e saj të parë Bashkia e Vlorës na informoi se ishte në fazën e studimit të fizibilitetit për ndërtimin e terminalit të autobusëve ndërqytetës.
Pas këmbënguljes së Faktoje për të mësuar se kush po e kryente këtë studim dhe sa ka kushtuar, bashkia Vlorë informoi se ka miratuar Planin e Përgjithshëm Vendor, në brendësi të të cilit ka parashikuar edhe terminalin e autobusëve në zonën e stacionit të trenit, në rrugën “Gjergj Kastrioti”.
“Është hartuar një projekt ide, por aktualisht nuk ka një projekt zbatimi të miratuar për terminalin e autobusëve”- sqaron më tej bashkia.
Në faqen e Agjencisë Kombëtare të Planifikimit të Territorit, në rubrikën e-harta ku Bashkia thotë se gjendet projekti në fjalë, nuk ka asnjë të dhënë lidhur me terminalin e autobusëve. Ndërsa në Planin Vendor të Bashkisë të ngarkuar në faqen e AKEP, vendimi i fundit i përditësuar i përket vitit 2020.
Duke përdorur të vetmin informacion që Bashkia Vlorë na dha për planin e ndërtimit të terminalit të autobusëve ndërqytetas, u nisëm drejt zonës së stacionit të trenit në rrugën “Gjergj Kastrioti” në Vlorë për të parë vendin ku parashikohet ndërtimi i tij.
Gjendja e zonës ishte e mjerueshme.
![](https://faktoje.al/wp-content/uploads/2023/12/image-82.png)
Godina thuajse 40 vjeçare, e braktisur dhe me xhama të thyer dhe rruga e mbuluar nga gropat me ujë dhe baltë, të jepnin përshtypjen se koha aty ka mbetur në vend.
![](https://faktoje.al/wp-content/uploads/2023/12/image-83.png)
![](https://faktoje.al/wp-content/uploads/2023/12/image-84.png)
Sipas një publikimi të Drejtorisë së Përgjithshme të Shërbimeve të Transportit Rrugor në vitin 2022 ku përfshihet plani për financimin e 4 terminaleve të autobusëve në vend, qarku Vlorë rezulton me një volum prej rreth 5 milionë udhëtarësh në vit.
Nisur nga informacioni i dhënë nga bashkia Vlorë se për terminalin autobusëve ndërqytetas ka një projekt ide, por jo një projekt zbatimi të miratuar dhe në mungesë të një dokumenti që vërteton projekt-idenë në fjalë, premtimin për ndërtimin e këtij terminali, do ta kategorizojmë deri tani të pambajtur.
*Faktoje, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.