BallinaFake newsDezinformimi në kohë krizashFushat e djegura me grurë në Michigan “shiten” si në Ukrainë

Fushat e djegura me grurë në Michigan “shiten” si në Ukrainë

Një lajm i publikuar nga portalet, ku thuhet se rusët po djegin fushat me grurë në Ukrainë, nuk është i vërtetë. Faktoje verifikoi se kjo foto është kryer në SHBA dhe nuk ka asnjë lidhje me luftën dhe shkatërrimet që po ndodhin në Ukrainë si rezultat i agresionit rus.

——————————————————————————————————————–

Publikimi i pamjeve të fushave më grurë që po digjen nga zjarri në mediat online ngjall sigurisht shqetësim tek çdo lexues i shqetësuar për një çështje mjaft të ndjeshme. Si për t’i hedhur më shumë benzinë zjarrit shërbejnë edhe titujt bombastikë të portaleve që e kanë publikuar këtë foto. Njëri prej tyre, portali “Rrugapress.al”, e shoqëron foton me titullin: “Rusët po na djegin bukën,’ pamje tragjike nga fushat e grurit në Ukrainë”. Një alarm që ngjall panik jo vetëm te qytetarët e thjeshtë, por rrezikon të krijojë shqetësim edhe për tregtarët dhe prodhuesit e bukës, të cilët Ukrainën e kanë furnizuesin kryesor të grurit.

Screenshot artikulli i publikuar nga portali

“Faktoje” vendosi të bëjë një verifikim të mëtejshëm dhe të zbulojë më tej se artikulli i portalit i referohet një postimi të bërë në Facebook nga politikani dhe gazetari Ihor Lutsenko. Por, si në shumë raste të tjera, nuk është bërë një verifikim i thjeshtë për të parë se ku janë këto fusha me grurë.

Gjatë një kërkimi të bërë në Google rezulton se kjo video është ngarkuar në YouTube më 18 korrik 2022 dhe në përshkrimin e bërë thuhet se pamjet janë filmuar në ‘Crystal Township në Montcalm County’, Michigan, SHBA. “Një zjarr ka rënë teksa fermerët po korrnin grurin e këtij viti. Nuk pati të lënduar apo humbje të pajisjeve bujqësore. Nuk dihet dëmi në të korra”, thuhet ndër të tjera në përshkrimin e bërë krahas pamjeve të publikuara. Pamjet janë xhiruar nga Larry Johnson, i cili më 30 korrik, nëpërmjet një postimi në Facebook kishte publikuar linkun e videos në Youtube. Ky konstatim i vendndodhjes së fushës së djegur konfimohet më tej edhe nga Associated Press dhe USATODAY.

Shumë media të tjera online në Shqipëri e kanë publikuar këtë artikull, duke iu referuar postimeve të bëra nga përdoruesit e rrjeteve sociale. Disa nga portalet që e kanë publikuar janë: abcnews.al, voxnews.al, kosovapost.net, gazetadita.al, shqipmedia. Kriza e grurit për shkak të konflktit Rusi-Ukrainë bëri që shumë përdorues të rrjeteve sociale, por edhe media online të binin pre e këtij lajmi të rreme. Verifikimi i burimeve të informacionit dhe kontrolli i fakteve janë shumë të rëndësishme para se të shpërndani një lajm apo një informacion që është publikuar masivisht.

Editor: Aimona Vogli Hotova

Ilda Hoxha
Ilda Hoxha
Gazetare Ka përfunduar studimet në nivelin “Bachelor” për “Gazetari dhe Shkenca Komunikimi” në “Universitetin e Tiranës” dhe studimet në nivelin “Master Shkencor” në drejtimin “Marketing Mediatik”. Ka punuar si gazetare në “Top Albania Radio” në periudhën janar 2013-dhjetor 2014. Ka punuar si gazetare në “Gazetën Shqip” në print për çështjet sociale në periudhën dhjetor 2014- korrik 2016. Në periudhën shkurt 2015-gusht 2017 ka punuar për “Votra Magazine”, ku ka mbuluar pjesën e marketingut të saj, por edhe shkrimin e artikujve me karakter kulturor dhe promovues për Shqipërinë. Ka punuar si redaktore në “Gazetën Shqip Online” në periudhën korrik 2016-deri më 19 maj 2021. Në periudhën qershor-gusht 2021 ka punuar si gazetare në emisionin “Pushime On Top” në Top Channel.

Të fundit

Më të lexuarat

spot_img