Gjatë vizitës së zhvilluar në Prishtinë më 6 korrik, kryeministri Edi Rama u prit në aeroport nga katër përfaqësues të palës kosovare, ndryshe nga çfarë pretendohet në disa artikuj të publikuar në mediat online. Kjo konfirmohet zyrtarisht për Faktoje nga Ministria e Punëve të Jashtme të Diasporës në Kosovë.
Në datat 6 dhe 7 korrik, kryeministri Edi Rama zhvilloi një tur ballkanik, në kuadër të “Procesit të Berlinit”. Kreu i qeverisë udhëtoi drejt Beogradit, Sarajevës, Prishtinës dhe Shkupit, ku zhvilloi takime me krerët e shteteve përkatëse.
Mirëpo, vëmendja e mediave u përqendrua te vizita që Rama zhvilloi në Prishtinë, pas refuzimit të kryeministrit të Kosovës, Albin Kurti për të takuar homologun e tij shqiptar. Mediat në Shqipëri publikuan disa artikuj, ku pretendonin se Rama u prit në aeroport vetëm nga ambasadori i Shqipërisë në Kosovë, Qemal Minxhozi.
“Rama në Prishtinë, në aeroport e pret vetëm ambasadori i Shqipërisë”, shkruan portali “Bold News”.
Screenshot, artikulli i publikuar nga portalet
Edhe në tekst shtjellohet më tej ky pretendim: “Rama mbërriti në Prishtinë në orën 16:20 dhe në aeroportin ‘Adem Jashari’ delegacioni shqiptar u prit vetëm nga ambasadori i Shqipërisë në Kosovë, Qemal Minxhozi”.
Në lidhje me këtë çështje, ne iu drejtuam me një kërkesë për informacion Ministrisë së Punëve të Jashtme të Diasporës në Kosovë. Zyrtarisht MPJD sqaron se përkundër aludimeve në media, nga zyrtarët kosovarë ishin katër përfaqësues që pritën shefin e qeverisë shqiptare në aeroportin e Prishtinës.
“Ju njoftomë se në pritje të kryeministrit të Republikës së Shqipërisë Edi Rama në aeroportin e Prishtinës ishin: Blerim Vela, Shef i Stafit të Presidentes së Republikës së Kosovës; Vehbi Miftari, Këshilltar i Presidentes; Skender Durmishi, Ambasador i Republikës së Kosovës në Shqipëri dhe Orhan Hajrizi, Udhëheqës i Divizionit të Ceremonialit”, bën të ditur MPJD.
Përgjigjia nga MPJD për Faktoje
Këtyre zyrtarëve të Republikës së Kosovës sigurisht që iu bashkua sipas protokollit shtetëror edhe ambasadori shqiptar në Prishtinë, z. Qemal Minxhozi.
Sigurisht, vihet re nga përgjigjia zyrtare se në aeroport nuk kishte asnjë përfaqësues të ekzekutivit të Kosovës, duke konfirmuar deri diku “ftohtësinë” e pritjes në aeroport.
Gjatë vizitës që zhvilloi në Prishtinë, kryeministri Edi Rama u takua me presidenten e Kosovës, Vjosa Osmanin dhe kryeparlamentarin, Glauk Konjufca.
