“Wizz Air” bëri ulje të detyruar në Romë për shkak të një emergjence shëndetësore dhe jo prej problemeve teknike, siç thuhet në portale. Kompania ajrore sqaron për “Faktoje” se çfarë ndodhi në bordin e avionit Tiranë-Lyon më 14 qershor.
Më 14 qershor, portalet publikuan një artikull ku theksonin se kompania ‘Wizz Air’ ka bërë ulje të detyruar në Romë, duke e lidhur këtë me ndonjë problem të mundshëm teknik nga ana e kompanisë së fluturimit.
“Panik në ajër, rrëngalla e Wizz Air bën ulje të detyrueshme në Romë”-shkruan portali “Gazeta jonë”.
Screenshot, lajmi i publikuar nga portali
Në artikull nuk jepen detaje të mëtejshme mbi arsyet e këtij incidenti, por thjesht theksohet se “ka shpallur gjendje emergjence gjatë tranzitit mbi Itali”.
Mirëpo, në një postim të bërë në Facebook nga mjeku Erion Dasho bëhet e ditur se gjatë fluturimit me Wizz Air, doktor Petrit Vargu kishte shpëtuar jetën e një pasagjereje.
“Në bordin e Wizz Air, Dr. Petrit Vargu shpëton një jetë në mijëra metra lartësi duke bërë që udhëtarja nga sot, të gëzojë një jetë të dytë! Krenar për ty, miku im, dhe për të gjithë bluzat e bardha që shpëtojnë jetë”, shkruan Dasho në Facebook.
Në komentin e tij në këtë postim, mjeku Vargu sqaron: “Ishin minuta të vështira, në kushtet në të cilat ndodhesha. Më dukej vetja sikur isha në film. Gjithçka shkoi mirë. Vajza (më saktë një grua rreth të 40-ve) është në Romë jashtë rrezikut për jetën”.
Postimi i Dashos në Facebook dhe përgjigjia e doktor Vargut
Duke marrë shkas nga ky postim, “Faktoje” iu drejtua me një email kompanisë ajrore “Wizz Air”, ku e pyetëm se cilat ishin arsyet e uljes emergjente në Romë. Zyrtarisht kompania bën të ditur se fluturimi Tiranë-Lyon u devijua në Romë për shkak të një emergjence shëndetësore.
“Fluturimi i Wizz Air W4 3889, më 14 qershor 2023 nga Tirana në Lyon u devijua në Romë pasi një pasagjer pësoi një urgjencë mjekësore. Për shkak të privatësisë, nuk ka asnjë informacion në lidhje me pasagjerin apo gjendjen shëndetësore. Ekuipazhi ynë ofroi kujdes urgjent për pasagjerin dhe organizoi ndihmën mjekësore pas mbërritjes në Romë.
Pasi pasagjeri u dërgua në spital, fluturimi vazhdoi për në Lyon pa probleme të mëtejshme. I dërgojmë urimet tona pasagjerit përkatës dhe falënderojmë ekuipazhin tonë për veprimet e shpejta për të ofruar ndihmë.
Edhe pse ngjarja ishte jashtë kontrollit të linjës ajrore, ne u kërkojmë ndjesë të gjithë pasagjerëve për vonesën”, bën të ditur kompania ajrore.
Përgjigjia e Wizz Air për Faktoje
Ndryshe nga çfarë pretendon portali, se “rrëngalla Wizz Air krijoi panik në ajër”, në fakt e gjithë situata erdhi për shkak të një situate shëndetësore dhe jo nga defektet teknike të avionit.
Në përgjigjen e saj, kompania ajrore lë pa përmendur ndihmën e doktor Vargut, duke falenderuar vetëm ekuipazhin e saj për ndërhyrjen. Ne kontaktuam edhe mjekun e njohur për të marrë një version të tij për ngjarjen, por deri në publikimin e lajmit nuk kemi një reagim prej tij.
Shënim:
Data 19 qershor 2023 website Gazeta Jonë e ka korrigjuar tekstin pas verfikimit të lajmit nga ana e Faktoje. Lajmit të raportuar i është ndryshuar vlerësimi fillestar në Facebook.
