Bashkia e Dibrës ka përfunduar asfaltimin e rrugës në lagjen Lekaçe në Maqellarë. Gjatë një verifikimi që Faktoje bëri në terren rezulton se kryebashkiaku i Dibrës, Rahim Spahiu e mbajti zotimin e bërë para banorëve në fushatën për zgjhdjet e 14 majit. Tani ata kërkojnë që ndërhyrja të shtrihet edhe në rrugicat e lagjeve.
Në prag të zgjedhjeve vendore të 14 majit, kryebashkiaku i Dibrës, Rahim Spahiu, i cili garonte për mandatin e radhës, premtoi shtrimin e rrugës në lagjen Lekaçe në Maqellarë.
“Në Burim do të asfaltojmë brenda pak javësh rrugën e lagjes Lekaçe”-premtoi kryebashkiaku në 29 prill 2023.
Postimi i shpërndarë në Facebook nga kryebashkiaku Rahim Spahiu, 29 prill 2023
Faktoje vendosi të verifikojë premtimin e kryebashkiakut të zgjedhur të Dibrës, Rahim Spahiu. Fillimisht iu drejtuam me një kërkesë për informacion Bashkisë së këtij qyteti. Zyrtarisht institucioni bën të ditur për Faktoje:
“Kanë përfunduar punimet për asfaltimin e rrugës në lagjen Laçe. Vlera e investimit është 45,270,928 lekë me TVSH. Kjo rrugë u shërben 487 banorëve”.
Për të parë nga afër përmbushjen e zotimit, ne udhëtuam drejt Maqellarës më 4 dhjetor, ku dallohej ndërhyrja dhe shtrimi me asfalt në të gjithë gjatësinë e rrugës në lagjen Lekaçe.
“Shumë mirë e kanë bërë rrugën, na hoqën një problem të madh me baltën dhe pluhurin. Ta bënin taman punën kishin hedh dhe një ‘dorë’ asfalt në këto rrugicat e vogla nëpër lagje”, thotë një banore e zonës.
Rruga në lagjen Lekaçe, 4 dhjetor 2023
Banorët e lagjes Lekaçe tregojnë se ka disa muaj që ka përfunduar rruga dhe se rikonstruksioni i saj, një investim i shumëpritur prej tyre.
Rruga në lagjen Lekaçe, 4 dhjetor 2023
“Problem i madh ishte kjo rrugë. Të paktën këtë dimër nuk do kemi baltë nëpër këmbë”, thotë një tjetër banor i lagjes Lekaçe.
Rruga e asfaltuar në lagjen Lekaçe, 4 dhjetor 2023
Nisur nga verifikimi i kryer në terren dhe informacioni i grumbulluar, premtimin për aslfatimin e rrugës në lagjen Lekaçe në Maqellarë, do ta kategorizojmë të mbajtur.
*Faktoje, e mbështetur nga National Endowment for Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.
