BallinaProjekteNxitja e llogaridhënies së zyrtarëve të lartëRindërtimi i kopshti publik në Vorë, “peng” i procesit të shpronësimit

Rindërtimi i kopshti publik në Vorë, “peng” i procesit të shpronësimit

Kopshti publik i Vorës, i shembur prej prillit 2021, duhet t’i nënshtrohej procesit të rindërtimit. Edhe pse objektet arsimore janë konsideruar si një prioritet i kësaj bashkie dhe fondi është akoluar nga qeveria shqiptare, kjo ndërtesë është ende peng i fazës së shpronësimeve. Banorët në Vorë shprehen se kopshti ishte i ri dhe nuk kishte shumë kohë që ishte ndërtuar, ndërsa Faktoje verifikoi se aktualisht 130 fëmijët e këtij kopshti janë zhvendosur në një godinë private 2-katëshe.

……………………………………………………………………….

“Rindërtimi i objekteve arsimore vijon me prioritet”, shkroi në një postim në Facebook kryebashkiaku i Vorës, Gentian Picari më 14 qershor të këtij viti, teksa njoftoi përfundimin e punimeve të kopshtit në fshatin Marqinet 1.

Postimi i kryebashkiakut të Vorës, Gentian Picari, 14 qershor 2021

Në muajin prill 2021, kopshti publik i Vorës ku shkojnë 130 fëmijë të kësaj u shemb, për t’i hapur rrugën projektit të ri rregullues për qendrën e Vorës.

Si po shkon procesi për ndërtimin e kopshtit të Vorës?

Më 14 prill 2021 nëpërmjet VKM 236, Qeveria Shqiptare ka alokuar nga Fondi i Rindërtimit për Bashkinë Vorë vlerën 88.433.787 lekë pa TVSH, për rindërtimin e godinës së kopshtit publik Vorë.

Screenshot nga VKM që i alokon fondet bashkisë së Vorës.

Këtë vlerë për ndërtimin e kopshtit e pranon dhe bashkia në përgjigjen e saj për Faktoje. Ky institucion na bën me dije se ende nuk ka nisur puna për ndërtimin e këtij objekti arsimor, teksa theksohet se kopshti është ende në fazën e shpronësimit, edhe pse fondet për rindërtimin e tij janë alokuar që në prill.

Screenshot përgjigjet e Bashkisë Vorë

Faktoje ishte në Vorë në tetor 2021, për të parë se çfarë zgjidhje ishte ofruar nga Bashkia për fëmijët, pas shembjes së kopshtit publik. Ne mësuam se aktualisht, fëmijët e ndiqnin kopshtin në një banesë private të marrë me qira, në qendër të Vorës. Ndërtesa 2-katëshe ishte përshtatur si kopsht, ku ofroheshin të gjitha shërbimet për të miturit.

Godina ku janë zhvendosur fëmijët, 15 tetor 2021

Drejtoresha e këtij institucioni, Albana Muzhaqi tha se aty janë 130 fëmijë, të zhvendosur në këtë godinë që në fund të muajit mars.

“Në këtë kopsht janë 130 fëmijë. Kemi ardhur këtu që vjet në fund të marsit, fillim të prillit. Do të qëndrojmë derisa të bëhet kopshti i ri. Do bëhen bashkë, shkollë e mesme, 9-vjeçare dhe kopsht. Shërbimi ofrohet për fëmijët dhe kushtet janë të mira”, sqaroi drejtoresha e kopshtit publik në Vorë, zonja Albana Muzhaqi.

Banorët e Vorës, pranojnë se kopshti publik nuk kishte asnjë dëmtim nga tërmeti, duke shtuar se ishte shembur për t’i hapur rrugë projektit rregullues për qendrën e Vorës.

“Kopshti që u shemb ka qenë i ri, nuk kishte shumë që ishte ndërtuar. Kopshti u shemb para disa muajsh. Kishte shumë fëmijë në atë kopsht. Tani kanë marrë një objekt tjetër me qira ku qëndrojnë fëmijët, një shtëpi private 2-katëshe”, tha një banor rreth 45 vjeç.

Një banore rreth 50 vjeçe shtoi: “Kopshtin e ka shembur shteti, do bëhet rregullimi i territorit na kanë thënë. E kanë prish dhe kanë marrë me qira një ambient më lart”.

Në faqen e bashkisë nuk ka asgje të publikuar në lidhje me planin rregullues të Vorës.

Screenshot faqja e Bashkisë Vorë

Nisur nga përgjigja zyrtare e bashkisë dhe nga verifikimi në terren premtimin për dhënie përparësi të objekteve arsimore dhe ndërtimin e kopshtit publik në bashkisë së Vorë, do ta kategorizojmë si Të Pambajtur.

“Faktoje”, e mbështetur nga National Endowment Democracy (NED) po monitoron 15 bashki në vend dhe po verifikon nëse janë mbajtur ose jo premtimet e dhëna nga kryebashkiakët.

Ilda Hoxha
Ilda Hoxha
Gazetare Ka përfunduar studimet në nivelin “Bachelor” për “Gazetari dhe Shkenca Komunikimi” në “Universitetin e Tiranës” dhe studimet në nivelin “Master Shkencor” në drejtimin “Marketing Mediatik”. Ka punuar si gazetare në “Top Albania Radio” në periudhën janar 2013-dhjetor 2014. Ka punuar si gazetare në “Gazetën Shqip” në print për çështjet sociale në periudhën dhjetor 2014- korrik 2016. Në periudhën shkurt 2015-gusht 2017 ka punuar për “Votra Magazine”, ku ka mbuluar pjesën e marketingut të saj, por edhe shkrimin e artikujve me karakter kulturor dhe promovues për Shqipërinë. Ka punuar si redaktore në “Gazetën Shqip Online” në periudhën korrik 2016-deri më 19 maj 2021. Në periudhën qershor-gusht 2021 ka punuar si gazetare në emisionin “Pushime On Top” në Top Channel.

Të fundit

Më të lexuarat

spot_img