Qeveria e re e Nigerisë nuk ka ndërprerë dërgimin e uraniumit në Francë. Raportimet dhe verifikimet e mediave ndërkombëtare tregojnë se nuk ka asnjë provë të besueshme për të mbështetur se ka pasur një njoftim të tillë nga qeveria e vendit.
Një valë e re dizinformimi po shoqëron zhvillimet e fundit pas grushtit të shtetit në Nigeri. Një postim i shpërndarë në rrjetet sociale pretendon se qeveria e dalë nga grushti i shtetit në Nigeri ka njoftuar bllokimin e dërgimit të uraniumit në Francë.
“Qeveria e re kërkoi tërheqjen e bazave të shteteve të huaja (SHBA, Francë, Itali) nga vendi dhe ndërprerjen e dërgesave të uraniumit në Francë (ajo furnizon 25% të nevojave të Francës për uranium) dhe si reagim mori një ultimatum nga Nigeria dhe një refuzim për t’u tërhequr nga dy vendet e para (SHBA dhe Franca)”-shkruhet në postimin e një përdoruesi të Facebook.
Postimi i shpërndarë në rrjetet sociale
Në lidhje me këtë posim, ne bëmë një verifikim, fillimisht duke iu referuar informacioneve të shpërndara nga mediat ndërkombëtare. Në lidhje me këto pretendime, BBC shkruan se nuk ka asnjë provë që junta lëshoi një ndalim për eksportet e uraniumit në Francë.
Referuar informacioneve të BBC, kompania franceze e përfshirë në minierat e uraniumit në Niger, Orano Group, tha se aktivitetet e saj kishin vazhduar në zonat Arlit dhe Akokan dhe në selinë e saj në Niamey, pas grushtit të shtetit.
Edhe kolegët e verifikimit të fakteve të “Reuters” kanë konfirmuar se nuk ka asnjë informacion zyrtar të verifikuar nga autoritetet e Nigerisë dhe as nga ata që kanë kryer grusht shteti ndaj Presidentit të Nigerisë, për ndërprerjen e eksporteve të uraniumit në Francë.
Veç kësaj, Agjencia bërthamore e BE-së Euratom i tha Reuters se Nigeria ishte furnizuesi i dytë më i madh i uraniumit natyror në Bashkimin Evropian vitin e kaluar. Agjencia nuk sheh rrezik të menjëhershëm që vendeve të BE-së t’u përfundojë uranium, pasi ka rezerva të mjaftueshme, edhe nëse Nigeria do të vendosë të shkurtojë dërgesat e saj.
Gjithashtu, Nigeria është prodhuesi i shtatë më i madh në botë i uraniumit, sipas Shoqatës Botërore Bërthamore (WNA).
Në fund të korrikut, ushtria nigeriane përmbysi presidentin, Mohamed Bazoum, pezulloi kushtetutën dhe shpërndau të gjitha institucionet.
