Ermal Mamaqi nuk është djali i shkrimtares së njohur Adelina Mamaqi, siç pretendohet nga portalet. Numri i lartë i ndjekësve në rrjetet sociale mesa duket është arsyeja e përfshirjes së aktorit në disa artikuj që kanë për synim tërheqjen e klikimeve.
Më 22 mars është publikuar online një artikull që tregon detaje mbi jetën e shkrimtares Adelina Mamaqi, vështirësitë dhe sfidat në jetën e saj, duke përmendur në titull edhe aktorin Ermal Mamaqi.
“Adelina Mamaqi shpërthen në lot, vështirësitë pas divorcit dhe gabimi me djalin, aktorin e humorit Ermal Mamaqi”-shkruan portali ‘Alfapress.al’. Për shkak të disa elementëve në përmbajtjen e titullit, emrat e dy personazheve të njohur, një dramë familjare dhe rrëfimi personal, lajmi ka ngjallur interes në rrjetin Facebook duke u ndarë nga 10 përdorues dhe klikuar mbi 30 mijë herë gjatë 4 ditëve të fundit.
Screenshot, artikulli i publikuar nga portali
Në titull portali përmend një “gabim” që shkrimtarja e njohur ka bërë me të birin, që sipas tyre është Ermal Mamaqi. Nëse do të shohim më tej në brendësi të tekstit, në artikull nuk përmendet në asnjë moment aktori Ermal Mamaqi. Teksti i portalit ‘Alfapress.al’ është marrë nga “Abc Neës”, ku zonja Mamaqi ka dhënë intervistën. Mirëpo, në asnjë pjesë të intervistës ajo nuk flet për Ermal Mamaqin si djalin e saj.
Gjatë një kërkimi të thjeshtë të bërë në Google, rezulton se Adelina Mamaqi ka dy djem dhe emrat e tyre sipas rrëfimit të vetë shkrimtares janë Darling dhe Bledar.
Edhe më herët, Mamaqi ka folur për fëmijët e saj ku ka treguar emrat dhe fotot e tyre: “Ky është Bledari, i vogli dhe Darling, i madh. Një nga djemtë jeton në Itali, ndërsa Bledari jeton në Shqipëri”.
Pra, siç shihet nga rrëfimet e shkrimtares, Ermal Mamaqi nuk është djali i saj, siç pretendon portali në titulli.
Aktori Ermal Mamaqi ka publikuar shpeshherë foto të prindërve të tij, të cilëve u ka shprehur mirënjohjen për suksesin e arritur.
