Ministria e Shëndetësisë e cila njoftoi heqjen e çadrës së vaksinimit më 25 nëntor të 2021, duket se nuk ka një plan për ta kthyer sërish atë. Në një përgjigje të paplotë që ironikisht mbërriti në redaksinë e Faktoje, një ditë para afatit për heqjen e fshatit festiv në Sheshin “Skëndërbej”, MSH nuk jep informacion nëse do vendoset çadra e vaksinimi. Ky institucion është mjaftuar me një njoftim se procesi është zhvendosur në qendrat shëndetësore dhe në ambientet e stadiumit ‘Air Albania’.
…………………………………………………………………………..
Më shumë se një muaj nga heqja e çadrës së vaksinimit nga Sheshi “Skënderbej”, më 24 nëntor dhe zëvendësimn me fshatin festiv nga bashkia Tiranë, po atë ditë, Ministria e Shëndetësisë u kujtua të dërgojë përgjigjen zyrtare pas pyetjeve të adresuara nga Faktoje.
Kërkesa për informacion dërguar MSH, 24 nëntor 2021
Përgjigja e Ministrisë së Shëndetësisë mbërritur në redaksinë e Faktoje më 5 janar 2022
Përgjigje nga Ministria e Shëndetësisë erdhi vetëm pas ankimimit të bërë në adresë të Komisionerit Për Të Drejtën e Informimit. Ajo mban datën 30 dhjetor 2021 dhe ironikisht mbërriti me postë në zyrat e Faktoje më 5 janar 2022, ose një ditë para afatit për heqjen e fshatit festiv në Sheshin “Skënderbej”.
Foto nga zona festive në Sheshin “Skënderbej”
Në përgjigjen e cunguar MSH sqaron se prej datës 25 nëntor vaksinimi është zhvendosur pranë qendrave shëndetësore dhe në ambientet e stadiumit ‘Air Albania’ në kryeqytet, ndërkohë që nuk jep asnjë informacion në lidhje me arsyet e heqjes së saj dhe nëse çadra e vaksinimit do të rivendoset në shesh.
“Ministria e Shëndetësisë dhe Mbrojtjes Sociale ka njoftuar heqjen e çadrës së vaksinimit të vendosur prej muajsh në sheshin “Skënderbej” në Tiranë. Sipas njoftimit që është bërë, duke filluar nga data 25 nëntor çadra e vaksinimit është zhvendosur pranë qendrave shëndetësore, si dhe pikës së vaksinimit të përqendruar në stadiumin ‘Air Albania’. Ekipi i vaksinatorëve dhe mjekëve kanë qenë në shërbim pranë qendrave shëndetësore si dhe në stadiumin ‘Air Albania’, ku ka vijuar çdo ditë vaksinimi anticovid”- thuhet në përgjigjen e MSH.
Faktoje publikoi një artikull në 25 nëntor ku raportonte se çadra e vaksinimit ishte hequr, ashtu siç u njoftua zyrtarisht nga Ministria e Shëndetësisë vetëm dy ditë para, më 23 nëntor. Por, ndryshe nga çfarë pritej, më 24 nëntor kishte dyndje të qytetarëve për të bërë dozën e tretë të vaksinës anti-covid, pasi ishin informuar për heqjen e çadrës.
Gjatë verifikimit në terren më 24 nëntor, ende pa u larguar çadra e vaksnimit, në sheshin “Skënderbej” kishte nisur puna nga Bashkia e Tiranës për ngritjen e “Fshatit të Festave” dhe vendosja e shtëpizave prej druri.
Foto nga zona festive në Sheshin “Skënderbej”
Në lidhje me aktivitetin “Festa në Tiranë”, Bashkia e Tiranës bëri të ditur për Faktoje se leja për organizimin e saj kishte afat në Sheshin “Skënderbej” deri në datë 6 janar 2022.
“Në mbështetje të kreut VI, të vendimit nr.130, datë 15.11.2018 të Këshillit Bashkiak ‘Për miratimin e rregullores ‘Për kushtet dhe rregullat e zënies së hapësirave publike në Bashkinë e Tiranës’, Drejtoria e Përgjithshme Juridike e Aseteve dhe Licencimit lëshon leje për zhvillim aktiviteti promovues, artistik, kulturor, manifestim politik etj, në hapësirë publike për subjektet, të cilat plotësojnë dokumentacionin e kërkuar sipas formularit të aplikimit. Në sheshin ‘Skënderbej’ do të zhvillohet aktiviteti ‘Festa në Tiranë’ për periudhën kohore 28 nëntor 2021-6 janar 2022”- njoftoi Bashkia e Tiranës për Faktoje më 13 dhjetor.
Përgjigja e Bashkisë Tiranë për Faktoje
Ngritja e fshatit festiv ku u shënuan grumbullime masive, pikërisht në vendin ku ishte çadra e vaksinimi u argumentua nga kryebashkiaku Veliaj gjatë një interviste në prag të Krishtlindjes:
“Unë besoj, me mënyrën që është menaxhuar, sidomos ne Tiranë me vaksinat, me atmosferën që është krijuar në shesh, me fishekzjarret që kemi porositur, mendoj që Viti i Ri është një lloj terapie kolektive. Në pamundësi për të shkuar te psikologu për t’u rrëfyer, është një lloj çlirimi i energjisë negative, toksinave, që kemi grumbulluar nga historitë e pakendshme dhe unë besoj që është terapia më e madhe kolektive ajo java e fundit e vitit, ku njerëzit puthen, përqafohen ku ka festa, dreka e darka.”
Në lidhje me çështjen e vaksinimit, MSH njoftoi më 17 dhjetor 2021 se vijonte vaksinimin masiv në pikat e përqëndruara tek qendrat shëndetësore, poliklinikat si dhe nëpërmjet njësive të lëvizshme në komunitet në kuadër të aksionit kombëtar “derë më derë”.
