Pretendimi: Papa Françesku i kërkoi Ukrainës të dorëzohet dhe të pranojë negociata me Rusinë për të shpëtuar viktima të mëtejshme
Rate: Missing context
Papa Françesku nuk ka kërkuar që Ukraina të dorëzohet në luftën e saj me Rusinë, siç pretendohet në artikuj të shpërndarë në portale. Faktoje verifikoi se Ati i Shenjtë foli për një negociim për t’i dhënë fund luftës me Rusinë.
Një intervistë e Papë Françeskut mbi konfliktin në Ukrainë dhe Gaza, ku ai bën thirrje për bisedime dhe negociata, ka tërhequr vëmendjen e mediave në mbarë botën. Çështja që ka shkaktuar më shumë “tronditje” dhe interpretime është një deklaratë e kreut të kishës katolike për ngritjen e flamurit të bardhë nga Ukraina dhe uljen e saj në bisedime me Rusinë.
Kjo pjesë e intervistës është interpretuar nga disa media si një thirrje e Papës për t’u dorëzuar pas humbjes së luftës.
Portali “TeSheshi” e ka publikuar në 10 mars artikullin mbi intervistën me titullin: “Papa, kërkesë Ukrainës ‘të dorëzohet”.
Artikujt e shpërndarë në portale
Në brendësi të tekstit mund të dallohet më shumë se bëhet fjalë për negociim më shumë sesa për dorëzim.
Për këtë artikull, portali i referohet intervistës që Papa ka dhënë për televizionin zviceran RSI. Ne vendosëm të bëjmë një verifikim të mëtejshëm, duke kërkuar intervistën e plotë që Ati i Shenjtë ka dhënë për mediat.
Në intervistën e plotë të zbardhur në shqip nga “Vatican News” thuhet se Papa ka kërkuar që të negociohet nga ana e Ukrainës pavarësisht se nuk është shkaku i luftës.
“Papë Françesku është i ftuar në Cliché, revistë kulturore e Lorenzo Buccella-s që transmetohet në Radio Televizionin Zviceran (RSI), në një episod kushtuar të bardhës, ngjyrës të së mirës, të dritës, por në të cilën bien më shumë gabimet dhe njollat. Mes shumë ndyrësive është lufta, konflikti në Ukrainë dhe ai në Palestinë”-raporton “Vatican News”.
Më tej në këtë intervistë Papë i përgjigjet pyetjes së gazetarit: Në Ukrainë ka nga ata që kërkojnë guximin e dorëzimit, të flamurit të bardhë. Por të tjerë thonë se kjo do të legjitimonte më të fortët. Çfarë mendoni ju?
“Është një interpretim. Por besoj se ata që e shohin situatën, ata që mendojnë për njerëzit, ata që kanë guximin të ngrenë flamurin e bardhë dhe të bisedojnë, janë më të fortë. Dhe sot mund të negociohet me ndihmën e fuqive ndërkombëtare. Fjala negocim është fjalë e guximshme. Kur sheh se je i mundur, se gjërat nuk po shkojnë mirë, duhet të kesh guxim për të biseduar. Të vjen turp, por me sa vdekje do të përfundojë? Negocioni në kohë, kërkoni ndonjë vend që të veprojë si ndërmjetës”, – u përgjigj Papë.
Pas keqinterpritimit të kësaj pjese të intervistës, Vatikani është detyruar të bëjë një deklaratë për mediat. Drejtori i Zyrës së Medias të Vatikanit, Matteo Bruni, deklaroi se Papë Françesku, nuk i kërkoi Ukrainës të dorëzohej, siç raportohet nga disa media, por synonte të bënte thirrje për një armëpushim dhe për të treguar për “guximin e negociatave”.
“Papë përdori metaforën e “flamurit të bardhë” të sugjeruar nga një gazetar për të theksuar rëndësinë e një ndërprerjeje të armiqësive, një armëpushim i arritur përmes guximit të negociatave. Diku tjetër në intervistë, duke folur në përgjithësi për luftën, Papë e bëri të qartë: “Negociatat nuk janë dorëzim”, tha Bruni, sipas Vatican News.
