Në tre vjet Shqipëria nuk ka bërë asnjë progres në lirinë e medias. Ky ishte lejtmotivi i konferencës për media të organizuar nga Qendra Europiane për Lirinë e Shtypit dhe Medias, partnerw të Këshillit të Europës, në përmbyllje të misionit dyditor për vlerësimin e lirisë së medias dhe sigurinë e gazetarëve në Shqipëri.

Jona Plumbi

Këtë e pranon edhe vetë Kryeministri – tha Ricardo Gutiérre nga Federata Europiane e Gazetarëve, pasi shprehu habinë që edhe pas tre vitesh nga vizita e fundit në Shqipëri, vendi nuk ka bërë asnjë përparim. Sipas tij është detyra e qeverisë që të ndërmarrë hapa për përmirësimin e lirisë së mediave dhe aksesit në informacion, përmes implementimit të rekomandimeve të përvitshme të Komisionit Europian.

Një nga problemet kryesore në lirinë e medias në vend, sipas gjetjeve të këtij misioni, është pronësia e mediave. Ndërthurja e interesave të biznesit dhe atyre politike kanë zënë vendin e interesit të publikut në linjat editoriale të mediave, gjë e cila pamundëson punën e gazetarëve.

Përfaqësuesi i “Reporterëve pa Kufij”, Pavol Szalai solli në vëmendje disa shifra lidhur me lirinë e medias, ndër të cilat përmendi faktin se Shqipëria renditet e fundit mes vendeve të Ballkanit Perëndimor në indeksin e lirisë së medias. Një prej tyre ishte matja e pluralizmit në media, kryer nga Qendra për Pluralizmin dhe Lirinë e Medias, institucion i bashkëfinancuar nga Bashkimi Europian. Sipas këtij monitorimi Shqipëria ishte e parafundit në renditje, me Turqinë që shënonte nivel më të lartë të indikatëorëve që cënojnë pluralizmin në media, si siguria thelbësore në punë, pluralizmi i tregut, pavarësia nga politika dhe përfshirja sociale.

Por ndërsa misioni njohu Kryeministrin Rama me rezultatet e këtij monitorimi, ata vetë u njohën me refuzimin kategorik të kryeministrit ndaj rezultateve të këtij studimi, duke mos pranuar pozicionimin vetëm një vend më lart Turqisë. – shpjegoi Gutiérre gjatë konferencës.

Një këshillë e drejtpërdrejtë ndaj qeverisë shqiptare ishte studimi i Aktit për Lirinë e Medias, që së fundmi është në diskutim në Bashkimin Europian, pasi ofron mënyra për zgjidhjen e problemit të transparencës së pronësisë së mediave dhe pavarësisë së redaksive ndaj vetë pronarëve.

Marrja dhe “shfrytëzimi” i ekspertizës europiane mbi këtë çështje nga qeveria shqiptare është diçka e pritshme nga Këshilli i Europës dhe organizmat që punojnë në këtë fushë, për përmbushjen e vullnetit të mirë të shprehur nga Kryeministri gjatë takimit me misionin, për miratimin e propozimeve ligjore që reflektojnë standard europiane. Përmbushja e këtij vullneti të mirë, do mbetet për t’u parë – përfundoi sekretari i përgjithshëm i Federatës Europiane të Gazetarëve.

Gjatë vizitës monitoriuese dyditore në Shqipëri, anëtarët e këtij misioni u takuan me aktorë të mëdias dhe shoqërisë civile, mes tyre edhe Faktoje.